14 кастрычніка, Мінск /Кар. БЕЛТА/. У ЕАЭС захоўваюцца рознагалоссі па пытанні фарміравання агульнага рынку газу, у сувязі з чым кіраўнікі дзяржаў вырашылі абмеркаваць пытанне пазней у вочным фармаце. Аб гэтым заявіў журналістам віцэ-прэм'ер Беларусі Ігар Петрышэнка па выніках праведзенага ў відэафармаце пасяджэння Вышэйшага Еўразійскага эканамічнага савета, перадае карэспандэнт БЕЛТА.

"І ў адкрытым фармаце тэма агульных рынкаў газу, нафты і нафтапрадуктаў, электраэнергіі, чыгуначных перавозак заўсёды ў парадку дня. Яна закраналася і ў адкрытым фармаце, і ў рамках закрытага фармату (у час пасяджэння. - Заўвага БЕЛТА). Па даручэнні кіраўнікоў дзяржаў, якое прымалася ў маі, мы павінны былі заслухаць інфармацыю, што зроблена па вялікім дагаворы па агульным рынку газу. Было даложана аб двух прынцыповых рознагалоссях, якія, на жаль, пакуль на гэтым этапе існуюць, - расказаў віцэ-прэм'ер. - Гэтыя рознагалоссі не новыя. Яны былі яшчэ ў 2018 годзе, калі мы падпісвалі канцэптуальныя дакументы, гэта тэма была вынесена за дужкі. Маецца на ўвазе тарыфаўтварэнне на транспарціроўку газу па тэрыторыі краін ЕАЭС".

Ігар Петрышэнка растлумачыў: краіны, якія не маюць гэтых рэсурсаў, зацікаўлены ў тым, каб былі аднолькавыя тарыфныя ўмовы пры транспарціроўцы газу. "А не так, што для нацыянальных суб'ектаў адны ўмовы, а для суб'ектаў, якія знаходзяцца за тэрыторыяй краіны, маючай гэтыя рэсурсы, - іншыя", - сказаў ён.

Таму ў час абмеркавання, кароткага абмену думкамі на праведзеным пасяджэнні Прэзідэнт Беларусі Аляксандр Лукашэнка прапанаваў: трэба гэта застарэлае пытанне абмеркаваць у вочным фармаце і вызначыцца канчаткова. "Або мы робім на гэтым этапе, або мы дзейнічаем па іншых напрамках. Гэту прапанову падтрымаў старшыня Вышэйшага Еўразійскага эканамічнага савета, Прэзідэнт Казахстана Касым-Жамарт Такаеў. І ўсе кіраўнікі дзяржаў падтрымалі і дамовіліся, што гэту тэму менавіта ў такім фармаце дадаткова абмяркуюць", - расказаў віцэ-прэм'ер.

У кантэксце згаданага дагавора таксама закраналася тэма ўстанаўлення тарыфаў на транспарціроўку газу з краін, якія не ўваходзяць у Еўразійскі эканамічны саюз. "У большай ступені гэта ініцыятыва Кыргызстана. Мы таксама адносна гэтай ініцыятывы не пярэчылі. І цяпер мы яе падтрымліваем, калі іншыя краіны прыйдуць да кансэнсусу па тым, каб гэта рэгуляванне знайшло адлюстраванне ў дагаворы", - адзначыў Ігар Петрышэнка.

Пытанне, калі менавіта кіраўнікі дзяржаў змогуць сабрацца ў вочным фармаце і абмеркаваць названае пытанне, пакуль застаецца адкрытым.

Як стала вядома БЕЛТА, у час абмеркавання газавага пытання, Аляксандр Лукашэнка падкрэсліў: калі краіны хочуць дасягнуць першапачатковых мэт, якія закладаліся пры стварэнні саюза, гэта пытанне павінна быць вырашана. Прычым знайсці кампраміснае рашэнне можна толькі пры асабістай сустрэчы.