На рэках Беларусі ў бліжэйшыя дні будзе пераважаць спад узроўняў вады

На рэках Беларусі ў бліжэйшыя дні будзе пераважаць спад узроўняў вады. Аб гэтым паведамілі БЕЛТА ў Рэспубліканскім цэнтры па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

"Рост узроўняў вады з інтэнсіўнасцю 1-7 см за суткі назіраецца на Дняпры на ўчастку Рэчыца - Лоеў, Бярэзіне на ўчастку Беразіно - Светлагорск, Нёмане каля Стоўбцаў, Сожы каля Слаўгарада, Прыпяці каля Нароўлі і некаторых малых рэках. На астатняй працягласці названых рэк, а таксама на Заходняй Дзвіне і Віліі адзначаецца спад узроўняў вады з сутачнай інтэнсіўнасцю да 50 см. На большасці рэк краіны вада знаходзіцца на пойме", - расказалі ў Белгідрамеце.

На Дняпры каля Жлобіна, прытоку Сожа рацэ Проня каля вёскі Ляцягі, Прыпяці каля Петрыкава і яе прытоку рацэ Пціч каля вёскі Першая Слабодка ўзроўні вады перавышаюць небяспечныя высокія адзнакі. Узроўні вады блізкія да небяспечных высокіх адзнак на прытоку Дняпра рацэ Друць каля вёскі Гарадзішча, Прыпяці каля вёскі Чэрнічы, яе прытоках рэках Случ каля аграгарадка Ленін і Цна каля вёскі Дзятлавічы.

Паводле даных МНС, адзначаюцца затапленні прыбярэжных тэрыторый у шэрагу раёнаў Гомельскай вобласці, а таксама ў асобных раёнах Брэсцкай і Магілёўскай абласцей. Тэмпература вады ў рэках павысілася і складае ад плюс 9,4 да плюс 18 градусаў, а ў вадаёмах - ад плюс 11 да плюс 15 градусаў.

Паводле інфармацыі гідролагаў, у бліжэйшыя дні на рэках Беларусі будзе пераважаць спад узроўняў вады, у выніку чаго на Дняпры каля Жлобіна ўзровень вады апусціцца ніжэй за небяспечную высокую адзнаку.

Усе навіны