Лукашэнка мае намер сустрэцца з кіраўнікамі беларускіх загранустаноў

У Прэзідэнта Беларусі Аляксандра Лукашэнкі запланавана нарада з кіраўнікамі беларускіх дыпламатычных прадстаўніцтваў за мяжой. Аб гэтым паведаміў сёння міністр замежных спраў Уладзімір Макей на семінары для кіраўнікоў дыпламатычных прадстаўніцтваў і консульскіх устаноў Беларусі, перадае карэспандэнт БЕЛТА.

Уладзімір Макей заўважыў, што ў гэтым годзе семінар мае асаблівае значэнне з улікам запланаванай нарады з удзелам кіраўніка дзяржавы і той новай сітуацыі, якая складваецца вакол Беларусі. "Мы працуем цяпер над новай стратэгіяй пашырэння нашых інтарэсаў у краінах Азіі, Афрыкі, таму нам ёсць што далажыць і пра што пагаварыць", - сказаў міністр.

"Кожны кіраўнік дыпмісіі, консульскай установы павінен дакладна разумець, што ад эфектыўнасці нашых намаганняў і рэзультатыўнасці работы, перш за ўсё на знешнеэканамічным напрамку, шмат у чым залежыць не толькі дынаміка развіцця эканомікі, але і ўстойлівасць беларускай дзяржавы ў цэлым", - падкрэсліў Уладзімір Макей.

На нараду з удзелам Прэзідэнта таксама запрошаны замацаваныя за канкрэтнымі краінамі вышэйшыя службовыя асобы, члены Савета Міністраў, кіраўнікі дзяржорганаў і арганізацый, вядучыя экспарцёры.

У беларускіх дыпламатаў таксама запланаваны нарады з віцэ-прэм'ерамі, сустрэчы з кіраўніцтвам і прадстаўнікамі профільных міністэрстваў і арганізацый, БелГПП, Еўразійскай эканамічнай камісіі. Кіраўнікі загранустаноў наведаюць Беларускую ўніверсальную таварную біржу, Беларускую нацыянальную біятэхналагічную карпарацыю і прадпрыемства "Штадлер Мінск".

"Пералік тэм семінара даволі шырокі і датычыцца не толькі эканомікі і гандлю. Гэта і інтэграцыйная праблематыка, і экспарт і інвестыцыі, лічбавізацыя, міжнароднае супрацоўніцтва ў энергетычнай, адукацыйнай, гуманітарнай і іншых сферах. Акцэнты будуць зроблены на інструментах падтрымкі экспарту і яго дыверсіфікацыі, пытаннях прасоўвання на знешнія рынкі прадукцыі медыцынскага прызначэння, аграпрамысловага комплексу. Прыярытэтная ўвага будзе ўдзелена актуальным пытанням нашага ўдзелу ў Еўразійскім эканамічным саюзе", - расказаў кіраўнік знешнепалітычнага ведамства.

У кантэксце работы, якая ідзе ў Беларусі па падрыхтоўцы канстытуцыйных змяненняў, у праграму семінара ўключаны сустрэчы са старшынямі Канстытуцыйнага суда і Цэнтрвыбаркама.

Аб тым, што ў Аляксандра Лукашэнкі летам запланавана сустрэча з беларускімі дыпламатамі, стала вядома яшчэ 6 красавіка пасля нарады ў кіраўніка дзяржавы па аптымізацыі сеткі беларускіх загранустаноў. "Кожны кіраўнік загранустановы павінен будзе далажыць аб сваёй рабоце і перспектывах", - сказаў тады Уладзімір Макей.

Сам жа Аляксандр Лукашэнка заявіў, што гэта будзе "канкрэтная справаздача ўсіх паслоў аб тым, што зроблена перш за ўсё ў эканоміцы".

БелТА

Усе навіны