Ядзернае паліва завязуць на БелАЭС у І квартале 2020 года

Ядзернае паліва завязуць на Беларускую АЭС у першым квартале 2020 года, паведаміў сёння журналістам намеснік міністра энергетыкі Беларусі Міхаіл Міхадзюк, перадае карэспандэнт БЕЛТА.

"Вы ведаеце, гэта не панацэя - завезці ядзернае паліва, мы ўжо да завозу практычна гатовы. Завязём яго за месяц-паўтара да пачатку фізічнага пуску, каб не стрымліваць тэмп работ, які сёння застаўся на першым энергаблоку. Мы завязём паліва ў першым квартале", - заявіў Міхаіл Міхадзюк.

Паводле яго слоў, на першым блоку ідуць перадпускавыя аперацыі, а менавіта гарачая абкатка абсталявання. "Гэты этап азначае, што ў ядзерны рэактар загружаны імітатары паліва. На рабочых параметрах станцыі абкатваем усё тэхналагічнае абсталяванне, ёсць пэўны рэгламент работ", - растлумачыў намеснік міністра. Па выніках абкаткі правядуць поўную рэвізію тэхналагічнага абсталявання першага і другога контуру. Наступны этап - загрузка ядзернага паліва, так званы фізпуск. Затым пасля пэўных аперацый блок уключаецца ў энергасістэму.

Беларуская АЭС з двума рэактарамі ВВЭР-1200 сумарнай магутнасцю 2400 МВт будуецца па расійскім праекце паблізу Астраўца (Гродзенская вобласць). Генеральным падрадчыкам выступае інжынірынгавы дывізіён дзяржкарпарацыі "Расатам" (АЭС). Увод першага блока запланаваны на 2020 год, другога - на 2021-ы.

Усе навіны