29 кастрычніка, Мінск /Кар. БЕЛТА/. Форменнае адзенне і знакі адрознення заснаваны для супрацоўнікаў Беларускага ўпраўлення дзяржаўнага ветэрынарнага нагляду на дзяржаўнай граніцы і транспарце. Гэта прадугледжана ўказам нумар 423, які 28 кастрычніка падпісаў Прэзідэнт Беларусі Аляксандр Лукашэнка, паведамілі БЕЛТА ў прэс-службе беларускага лідара.

Ветэрынарныя інспектары выконваюць важныя дзяржаўныя задачы: кантралююць перамяшчэнне жывёл, кармоў і кармавых дабавак праз дзяржаўную граніцу, рэалізуюць проціэпідэмічныя мерапрыемствы. Наяўнасць форменнага адзення са знакамі адрознення будзе візуальна пацвярджаць статус і паўнамоцтвы ветэрынарнага інспектара, а таксама садзейнічаць павышэнню іміджу беларускай ветэрынарнай службы на міжнародным узроўні.