Міхаіл Гумнянкоў, дырэктар ААТ «Шайтэрава» Верхнядзвінскага раёна: - Усё, аб чым гаварыў Прэзідэнт на нарадзе, прысвечанай аналізу стану спраў у сельскай гаспадарцы, далейшаму развіццю вёскі, закранае, на мой погляд, жыццё ўсёй краіны. Паляпшэнне ўрадлівасці глебы, а значыць, і павышэнне ўраджайнасці, прадуктыўнасці жывёлы, кадравае забеспячэнне сельскагаспадарчай вытворчасці шмат у чым залежаць ад працы калектываў і цэлых галін, здавалася б, далёкіх ад аграрнай. Кожны з нас на сваім працоўным месцы абавязаны клапаціцца аб харчовай бяспецы дзяржавы, нарошчваць вытворчасць, перапрацоўку і экспарт прадукцыі, што вырабляе сяло. Працуючы па ўсіх напрамках умацавання фінансава-эканамічнай дзейнасці гаспадаркі, наш калектыў ужо не адзін год робіць стаўку на ўласную перапрацоўку таго, што вырошчвае. Мы маем свой цэх па вырабе мясной прадукцыі, вырабляем яе 150 найменняў. За мінулы год, напрыклад, рэалізавалі 2,7 тыс.т гатовай і паўфабрыкатаў. Уласная перапрацоўка мяса дазволіла атрымліваць на 25-50% большую выручку, чым мелі б, здаўшы жывёлу на мясакамбінаты. Маем сваю гандлёвую сетку, якая налічвае 17 фірменных магазінаў і аўтамагазін. Брэнд «ААТ «Шайтэрава» сёння ўжо ведаюць далёка за межамі Верхнядзвіншчыны. Уласную перапрацоўку не абмежавалі толькі вытворчасцю мясной прадукцыі. Самі рыхтуем камбікармы для свінагадоўчага комплексу і буйной рагатай жывёлы. Дарэчы, сёлета ўвядзем у эксплуатацыю новы сучасны комплекс для БРЖ, павялічым на 500 кароў пагалоўе, а значыць, вытворчасць і рэалізацыю малака. І зробім усё, каб устаноўкі, дадзеныя кіраўніком дзяржавы, выканаць з максімальна добрай аддачай. Фота з архіву "ВВ".