Наталля Шэндрык, кіраўнік ААТ «Якубава-Агра», распавяла карэспандэнту «Дняпроўкі» аб штодзённых клопатах і поспехах працаўнікоў сельгаспрадпрыемства

Нарыхтоўка кармоў, ўборка рапсу, збожжавых, церабленне лёну, падрыхтоўка да азімай сяўбы. У гэтыя дні ў сельгаспрадпрыемствах адзін від работ змяняе іншы. У гэтым кругавароце падзей нам удалося пагаварыць з кіраўніком сельгаспрадпрыемства ААТ «Якубова-Агра» Наталляй Шэндрык аб штодзённых клопатах і поспехах працаўнікоў сельгаспрадпрыемства.

-У бягучым годзе травамi першага ўкосу мы нарыхтавалі 14,9 цэнтнера кармавых адзінак на ўмоўную галаву. Гэта на 4,3 цэнтнера больш у параўнанні з мінулым годам. Травы другога ўкосу, а гэта 750 га, у гаспадарцы ідуць на корм для 1450 галоў, якiя ўтрымлiваюцца ў чатырох статках, - кажа Наталля Шэндрык. - Таксама пакінулі каля 100 гектараў для другога ўкосу на сена.

У гаспадарцы яшчэ трэба будзе прыбраць 320 гектараў кукурузы, якія пойдуць на сілас. А гэта яшчэ плюс 14 цэнтнераў кармавых адзінак на ўмоўную галаву. Таксама запасы кармоў засталіся і з пераходзячага фонду мінулага года.

Поля ААТ «Якубова-Агра» традыцыйна цешаць высокай ураджайнасцю. Каторы год запар, нават не зазіраючы ў зводку упраўлення па сельскай гаспадарцы і харчаванню, можна беспамылкова назваць гэту гаспадарку Дубровенскага раёна перадавой, дзе назіраюцца адны з лепшых паказчыкаў.

І ў гэтым ўборачным сезоне ААТ «Якубова-Агра» размясцілася на лідзіруючай пазіцыі: ураджайнасць збожжавых тут складае 47,8 цэнтнера з гектара. Гэта другі паказчык па раёне.

-Галоўная задача - у аптымальныя тэрміны і з мінімальнымі стратамі сабраць вырашчанае. Дзеля гэтага механізатары працуюць ад світання да змяркання. Да канца ўборачнай атрымаць ураджайнасць менш за паказчык мінулага года мы не павінны, - спыняецца на дэталях уборачнай кампаніі Наталля Шэндрык і дадае: - Абы толькі надвор'е не падвяло.

На раніцу 14 жніўня ў гаспадарцы ўбрана 805 га, або 61%. Жніво ў ААТ «Якубова-Агра» - гэта хлебная ніва ў 1320 гектараў, на якой працуе 4 экіпажы камбайнераў. Кожны экіпаж - зладжаная і дружная каманда. Першыя тысячнікі ў гаспадарцы сёлета - дасведчаны старшы камбайнер Андрэй Шэндрык і яго напарнік Валерый Шастакоў.

-Для мяне гэта жніво - як мінімум дванаццаты сезон на камбайне, а можа і больш. Ураджай прыбіраць у радасць - паглядзіце, якая пшаніца ўрадзіла, - кажа Андрэй Шэндрык. - На жаль, два дні стаялі на рамонце. А за гэты час можна было 200 тон націснуць, як раз надвор'е было.

Цяперашні ўборачны сезон для Андрэя Шастакова пачаўся даўно. Спачатку прыбіраў рапс - амаль 300 тон намалаціў. А сёння ён, разам з напарнікам Валерыем Шастаковым, былым работнікам чыгункі, - у перадавіках гаспадаркі на жніве збожжа.

Таксама на збожжаўборачным камбайны тут працуюць экіпажы ў складзе Эдуарда Шусева і Віталя Мандрыка, Аляксандра Бацяна і Дзяніса Ганчарова, Уладзіміра Чмяркова і Генадзя Шандалесава. На адвозцы задзейнічаны вадзіцелі Аляксандр Бацян, Алег Халецкі, Сяргей Шаргаеў, Сяргей Глушакоў.

У стварыўшыхся умовах у ААТ «Якубова-Агра» ключавую ролю адыгрывае дапрацоўка зерня. Тут на першай план выходзяць спецыялісты зернесушыльных установак. І з гэтымі работнікамі сельгаспрадпрыемству таксама пашанцавала. Ужо не першы год на абслугоўванні зернесушылкі задзейнічаны машыністы Юрый Кіўкін і Рыгор Свiцiн. Неаднаразова яны былі сярод пераможцаў спаборніцтвы работнікаў АПК на жніве ў сваёй намінацыі. І нядаўна старшыня райкама прафсаюза работнікаў АПК Аляксандр Маленков ўручыў ім заслужаныя ўзнагароды.

Што тычыцца тэхнікі ў сельгаспрадпрыемстве, то пераважна гэта старыя камбайны, якія патрабуюць частага рамонту. Апошні камбайн тут атрымлівалі ў 2011 годзе. Наталля Шэндрык падзялілася, што ў бліжэйшы час чакаюць два новых збожжаўборачныя камбайны КЗС-1218.

З 15 жніўня ў сельгаспрадпрыемстве пачнуць сеяць азімы рапс. На палях гаспадаркі ён зойме 310 гектараў. Сяўбу азімых тут даверылі вопытнаму механізатару Аляксандру Марэцкаму. На ўзворванні глебы пад азімыя збожжавыя добрасумленна працуе механізатар Віталь Карманаў. На раніцу 14 жніўня ён ўзараў 330 гектараў.

-Кожны, хто вынікова працуе на жніве, атрымлівае добрую зарплату. Грашовыя прэміі атрымалі першыя камбайнеры-тысячнікі і вадзіцелі. Ушаноўваем перадавікоў сумесна з прафсаюзам, - распавядае Наталля Шэндрык.

Нават за самай добрай глебай патрэбен дбайны сыход. Менавіта так, па-гаспадарску, ставяцца да сваіх земляў у сельгаспрадпрыемстве. Так было, так ёсць і, напэўна, будзе. Бо працаўнікі ААТ «Якубова-Агра» ведаюць цану хлебу, любяць зямлю-карміцельку і перадаюць павагу да яе з пакалення ў пакаленне.

Юлія СТАРАВОЙТАВА.

Усе навіны