27 мая 2020
На Дубровеншчыне вядзецца падрыхтоўка да адкрыцця аздараўленчых лагераў
Імкліва набліжаецца доўгачаканая летняя пара. Акрамя цяпла, зеляніны і мары аб адпачынку яна нясе з сабой клопат аб бяспецы дзяцей, у якіх наступаюць канікулы. Аздараўленне і занятасць дзяцей - гэта галоўныя задачы дарослых ў дадзены перыяд. Мы пацікавіліся, як гэта праца будзе арганізавана на Дубровеншчыне.
Як паведаміла Ала Ходзiкава, галоўны спецыяліст аддзела па адукацыі
Дубровенскага райвыканкама, у раёне спланаваны цэлы шэраг мерапрыемстваў
па аздараўленні і ўключэнню дзяцей і падлеткаў у розныя віды
грамадска-карыснай дзейнасці. Згодна з рашэннем Дубровенскага
райвыканкама ў летні перыяд 2020 г. у раёне запланавана аздаравіць
каля 500 дзяцей. З іх 130 - у прышкольных лагерах з дзённым
знаходжаннем. Такія лагеры будуць працаваць на працягу лета ў сямі
ўстановах адукацыі. Кожная змена разлічана на 18 дзён. А расчыняць
свае дзверы прышкольныя лагеры ўжо з 1 чэрвеня. У першую змену аздараўленне
будзе арганізавана для навучэнцаў гарадскіх школ і Асінтарфскай сярэдняй
школы.
У перыяд з 27 ліпеня па 19 жніўня будзе працаваць аздараўленчы лагер у Зарубскай і Каліноўскай дзіцячых садках-сярэдніх школах.
Акрамя таго, на базе сярэдняй школы №1 г.Дуброўна пройдуць аздараўленне
25 навучэнцаў спецыялізаванай дзіцяча-юнацкай школы алімпійскага
рэзерву. У лагерах з дзённым знаходжаннем будзе арганізавана 3-х разавае
харчаванне, а для дзяцей 1-2 класаў і дзяцей з аслабленым здароўем -
дзённы сон.
Па словах Алы Ходзiкавай, у гэтыя дні поўным ходам вядуцца работы па
падрыхтоўцы да адкрыцця аздараўленчага лагера «Лугаўцы». Тут на працягу
лета плануецца аздаравіць 300 дзяцей ва ўзросце ад 6 да 15 гадоў. У
першую змену з 18 чэрвеня па 5 ліпеня лагер прыме каля 60 чалавек. І па
120 чалавек плануецца аздаравіць у другую і трэцюю змену, якія
будуць працаваць з 9 і 30 ліпеня адпаведна.
Ала Ходзiкава паведаміла, што ў раённым бюджэце прадугледжаны
сродкі для даплаты за пуцёўкі ў аздараўленчы лагер «Лугаўцы»
асобным катэгорыям дзяцей. Сярод іх дзеці-інваліды, дзеці са шматдзетных
сем'яў, дзеці з асаблівасцямі псіха-фізічнага развіцця; дзеці, у якіх
абодва бацькі - непрацуючыя пенсіянеры або інваліды 1 або 2 групы, а
таксама дзеці-сіроты і дзеці, якія засталіся без апекі бацькоў.
Летні перыяд - гэта не толькі адпачынак, але і магчымасць набыцця
першых працоўных навыкаў і невялікага, але свайго заробку. На
Дубровеншчыне запланавана арганізаваць 4 рамонтныя брыгады. Навучэнцы
Зарубскай, Добрынскай, Асінтарфскай і Каліноўскай школ будуць выконваць
рамонтныя работы па афарбоўцы сцен і падлог у сваіх установах адукацыі. На гэтыя мэты ўпраўленне па працы, занятасцi i сацыяльнай абароне вылучыла 16,3 тыс. рублёў.
У раёне назапашаны вопыт работы студэнцкіх атрадаў, куды ўцягваюцца
падлеткі з 14-гадовага ўзросту. У гэтым годзе студатрады плануюць
ажыццяўляць сваю дзейнасць у ААТ «Дубровенскі льнозавод»,
аздараўленчым лагеры «Лугаўцы», на мемарыяльным комплексе «Рыленкі», у
некаторых сельгаспрадпрыемствах раёна.
Акрамя таго, плануецца ў раёне і індывідуальнае працаўладкаванне
навучэнцаў. А яшчэ ўвесь летні перыяд будуць працаваць гурткі і аб'яднанні
па інтарэсах ва ўстановах адукацыі і Цэнтры дзяцей і моладзі.
-Летнi адпачынак - гэта не толькі сацыяльная абарона. Гэта свайго роду
пляцоўка для творчага развіцця, узбагачэння духоўнага свету і
інтэлекту дзіцяці. У рамках Года малой радзімы і 75-годдзя Вялікай Перамогі
для выхаванцаў аздараўленчых лагераў запланаваны завочныя
экспедыцыі і экскурсіі, конкурсы і фестывалі, гульні, святы,
спартыўныя эстафеты і спаборніцтвы. Атрымліваючы ў лагеры новыя ўражанні,
дзеці набудуць сацыяльны вопыт, паспрабуюць свае сілы, лепш асэнсуюць
навакольны свет, пасталеюць, памацнеюць, навучацца адказнасці і
самастойнасці, - падкрэсліла Ала Ходзiкава.
Святлана ШУРПАКОВА.
Усе навіны