15 чэрвеня 2020
На Дубровеншчыне разгортваюцца работы па нарыхтоўцы траў першага ўкосу
Паводле інфармацыі ўпраўлення па сельскай гаспадарцы і харчаванню
Дубровенскага райвыканкама, на раніцу 12 чэрвеня сельгаспрадпрыемствамі скошана
9,2% запланаваных на першы ўкос плошчаў. Нарыхтавана 2333 тоны
сенажу, 850 тон сіласу, 92 тоны сена. 538 тон травяной масы пайшло на
зялёны корм. Больш за ўсё тон кармавых адзінак нарыхтавана ў ААТ
«Баброва-Агра» - 220. Пра тое, як ідзе касавіца, нам распавёў
кіраўнік сельгаспрадпрыемства Аляксандр Мурашкiн.
-На жаль, надвор'е не дазваляе разгарнуцца ў поўнай меры, -
адзначае Аляксандр Мікалаевіч.- Прыступілі да корманарыхтоўкi ў пачатку
гэтага тыдня. На поле выйшлі два мехатрады. Адзін наш, другі - ААТ
«Дубровенскі райаграсэрвіс». Гэта каля 20 чалавек і тэхніка КВК-800,
граблі, касілкі, па тры адзінкі - на адвозцы. На шлязе працуюць тры
трактары: ноччу Амкадор, днём К-700 і МТЗ-322
Прама насупраць машыннага двара ААТ «Баброва-Агра» - роўныя валкі
скошанага разнатраўя, якое хутка ляжа ў сянажныя траншэі.
-Пад сена і сянаж у нас адведзена ў гэтым годзе 1200 гектараў. Плануем
нарыхтаваць 10-12 тыс. тон сенажу. Ужо прыбралі паўкосныя пасевы азімага жыта і азімай свірэпіцы. Нарыхтавалі 300 тон у стрэйч-плёнкi. Усяго нам па
плане трэба нарыхтаваць 30 цэнтнераў кармавых адзінак на ўмоўную галаву.
Па нашых разліках, нарыхтуем 32-34 цэнтнера кармавых адзінак, - упэўнены
А.Мурашкiн.
Забяспечыць неабходную колькасць корму аграрыі плануюць за адзін ўкос.
-Гэта не капрыз: корманарыхтоўка ідзе каля месяца, а там паспявае
азімая свірэпіца на зерне, рапс, збожжавыя. Пры нашай забяспечанасці
тэхнікай і, галоўнае, механізатарамі, усё не схопіш. Таму на адросшыя
травы пускаем на выпас жывёлы, зялёны корм - бычкі на адкорме. У нас на
пашах ўтрымліваецца 4 дойных статка - 715 галоў і 2 статка цёлак - 600
галоў, - уводзіў у курс справы кіраўнік прадпрыемства.
Добрыя вынікі атрымліваюць тут за кошт канюшыны. Для ўзмацнення і
паляпшэння кармавой базы ў гэтым годзе ў ААТ «Баброва-Агра» упершыню пасеялі
48 га люцэрны, якая дае за сезон некалькі ўкосаў. Павялічылі
плошчы кукурузы: усяго пасеялі 467 га, з якіх 360 га пойдзе на
зялёную масу і сілас, а 107 - на зерне.
Аляксандр Мурашкiн падкрэсліў, што ў іх прадпрыемстве 100%
забяспечанасць сянажнымi траншэямі: 7 дзеючых і дзве дабудоўваюцца.
Акрамя таго, каля тысячы тон будзе нарыхтавана ў рулоны з
выкарыстаннем стрэйч-плёнкі і сеткі.
-Гэта тэхналогія цалкам сябе апраўдала па выніках мінулага
года. Корм захоўваюцца лепш. Вось і жывёлаводы сталі з разуменнем
ставіцца да таго, што пасля раздачы кармоў гэтую плёнку і сетку
неабходна акуратна збіраць, каб не засмечваць палi і тэрыторыю ферм,
- адзначыў Аляксандр Мурашкiн.
Ён распавёў, што на прадпрыемстве стымулюецца добрасумленнае стаўленне да працоўных абавязкаў.
- Мы цалкам выконваем усе палажэнні Калектыўнага дагавора.
Механізатары атрымліваюць двухразовае харчаванне, забяспечваюцца пітной
вадой. Існуюць павялічаныя расцэнкі для працы ў начныя змены з
22.00 да 6.00. Праца ў святочныя і выхадныя дні аплачваецца ў
падвойным памеры. Падчас спякоты механізатар на кашэннi працуе з 4.00 да
8.00, затым перапынак да 17.00 і завяршае працу каля 21.00. Праца,
вядома, не з лёгкіх, але працаваць і зарабляць можна, - упэўнены
Аляксандр Мурашкiн.
Алена Корсакава.
Усе навіны