17 студзеня 2020
На Дубровеншчыне прайшоў «Калядны фэст»
У паганскую даўніну калядкі былі галоўнай зімовай падзеяй. Пасля прыняцця хрысціянства нашы продкі ўмела уплялі любімыя зімовыя забавы ў канву рэлігійных святаў, аднак і па гэты дзень калядкі захоўваюць сваю самабытнасць і мясцовы каларыт.
Так, на Дубровеншчыне сустракаюцца унікальныя песні, прыпеўкі і калядныя абрады. Адна з магчымасцяў пазнаёміцца з імі - традыцыйны «Калядны фэст». У гэтым годзе сталіцай фестывалю стаў аграгарадок Ерамееўшчына. Удзел у ім прынялі калектывы з чатырох сельскіх Дамоў культуры: Каліноўскага, Зарубскага, Ляхаўскага і Ляднянскага.
—Ерамееўшчына ўпершыню прымае падобнае свята, хоць самі мы штогод калядуем і запрашаем у госці ражаных, - расказала метадыст па фальклоры РДК Наталля Еслiкава. - Мы ставілі перад сабой мэту - ўзнавіць дух даўніны, таму для свята старанна падбіраліся касцюмы, вобразы. Сцэнар будаваўся па класічнай мадэлі: гэта шэсце па вуліцах, абыход двароў, гаспадары якіх адорвалі калядоўшчыкаў рознымі пачастункамі.
Каб пазнаёміцца з традыцыямі свята, карэспандэнты «Дняпроўскай праўды» наведалі некалькі двароў разам з адным з калектываў.
-Сярод ражаных - абавязковыя персанажы - гэта каза і мядзведзь, - распавяла дырэктар Каліноўскага СДК Антаніна Марозава. - Каза сімвалізуе гасціннасць, прадвесціць ўраджайны год, таму ў калядных традыцыях многія абрады звязаны менавіта з ёй. Мядзведзь, у першую чаргу, прыносіць у дом сілу і здароўе. Таксама калядоўшчыкі часта пераапраналіся ў цыган, малявалі каларытных суседзяў ці проста прыбіраліся. Усе песні, выкананыя калядоўшчыкамі, заключалі ў сабе добрыя пажаданні гаспадарам хаты. Разам з тым, лічылася, дрэннай прыметай не пусьціць ражаных на парог: гэта абяцала бяду, неўраджай і хваробы, - дадала Антаніна Якаўлеўна.
Гаспадыні, якіх мы наведалі ў гэты дзень, былі добра знаёмыя з прыметай і сустракалі калядоўшчыкаў хлебам-соллю. Алена Кабушава прызналася, што рыхтавацца да сустрэчы гасцей пачала яшчэ напярэдадні ўвечары:
-У нашым аграгарадку часта калядуюць, але ў фестывалі мы з мужам ўдзельнічаем упершыню, - падзялілася ўражаннямі Алена Мікалаеўна. - Было вельмі весела! Я б з задавальненнем паўдзельнічала ў фэсце зноў.
Была гатова да прыходу калядоўшчыкаў і Надзея Голубцова. Частуючы тых, хто прыйшоў, яна распавяла, як сама раней хадзіла калядаваць, якія цікавыя выпадкі з ёй былі.
—Мне падабаецца гэта свята, таму што я люблю гасцей. Гэта выдатна, калі дом - поўная чаша. І я веру, што такi вясёлы пачатак года сапраўды прынясе дабрабыт і зарадзіць ўсіх нас добрым настроем, — распавяла Надзея Андрэеўна.
Затым свята пераняслося на пляцоўку перад сельскім Домам культуры. Тут для дзяцей была арганізавана забаўляльная праграма: калядныя знаёмілі юных удзельнікаў з каляднымі песнямі і гульнямі. Працягнуў свята конкурс «Калядны разгуляй!». Калектывы прадстаўлялі сваю праграму, якая складалася з некалькіх намінацый: прадстаўленне каляднага персанажа, калядныя традыцыі мясцовасці, Калядная гульня і песня. Для гасцей і ўдзельнікаў фестывалю адбыўся канцэрт мастацкай самадзейнасці.
Яна ГУРСКАЯ
Усе навіны