16 лістапада 2020
Дубровенскі райаграсэрвіс - памочнік аграрыяў у Віцебскай вобласці
Наяўнасць у раёне прадпрыемства, здольнага забяспечыць своечасовае і
якаснае абслугоўванне аграрнага сектара, заклад эфектыўнай працы
ўсёй галіны. Адным з флагманаў сярод такіх прадпрыемстваў-памагатых
аграрыяў у Віцебскай вобласці застаецца ААТ «Дубровенскі райаграсэрвіс».
Адказнасць, якасць, увага - вось тры кіты, на якіх будуецца
яго дзейнасць.
Сёння Дубровенскі райаграсэрвіс прадастаўляе шырокі спектр
паслуг: забяспечвае сельгаспрадпрыемствы і іншыя арганізацыі раёна
таварамі вытворча-тэхнічнага прызначэння, мінеральнымі
ўгнаеннямі, займаецца рамонтам рухавікоў сельгастэхнікі, абсталявання
жывёлагадоўчых ферм, перавозкай грузаў, механізаванымі працамі.
На балансе прадпрыемства знаходзіцца транспартна-механізаваны атрад, у
складзе якога 34 адзінкі трактарнай тэхнікі, 8 аўтамашын, 7
бензавозаў. У гэтым годзе парк папоўніўся новым КВК-800-16. Камбайн
прызначаны для скошвання кукурузы ў любой фазе спеласці збожжа і
іншых высокасцябліністых культур. Дарэчы, тэхніка ўжо зарэкамендавала
сябе на палях дубровенскіх сельгаспрадпрыемстваў.
-Мы аказваем садзейнічанне сельгаспрадпрыемствам на ўсіх этапах: ад
падрыхтоўкі глебы да ўборкі збожжа і яго адвозцы. Зімой нашы спецыялісты
задзейнічаны на вапнаванні глеб, вывазцы арганікі, нарыхтоўцы лесу, -
распавёў начальнік участка аўтаперавозак Ігар Цімошчанка.
У гэтым годзе на палі раёна тэхнікай прадпрыемства вывезена 24 тысячы
тон арганічных угнаенняў. Правапнаваны кіслыя глебы на плошчы
больш за 6 тысяч гектараў. Дарэчы, такая паслуга аказваецца не толькі
сельгаспрадпрыемствам Дубровенскага раёна, але і раёнаў: Аршанскага,
Шумілінскага, Лёзненскага, Ушацкага, Бешанковіцкага. Візітнай
карткай прадпрыемствы застаюцца рамонтныя майстэрні, пункт ТО,
аддзяленне лінейна-мантажных работ.
У райаграсэрвісе працуе сем выязных брыгад, у склад якіх уваходзяць слесар-кіроўца і газаэлектразваршчык. Яны займаюцца рамонтам артэзіянскіх свідравін, заменай глыбінных
помпаў, рамонтам сельскагаспадарчых памяшканняў. Да лістапада сіламі
мабільных брыгад праведзены рэканструкцыі жывёлагадоўчых памяшканняў,
адрамантавана дзевяць сістэм аўтопаення, дзесяць - выдалення гною.
Сярод перспектыўных напрамкаў, якім сёння надаецца ўвага, у
ААТ «Дубровенскі райаграсэрвіс» назвалі дрэваапрацоўку. Прадпрыемства
заключыла дамовы на пастаўку паллетной дошкі ў краіны Еўрапейскага
Саюза. Акрамя таго, піламатэрыялы рэалізуюцца насельніцтву, дранку пастаўляюць
на Беларускую ГРЭС.
Але, як вядома, поспехі прадпрыемства - гэта дасягнення яго
супрацоўнікаў, а падобны ахоп работ патрабуе наяўнасці кваліфікаваных
спецыялістаў. У райаграсэрвісе працуе 128 чалавек. Калектыў
сфармаваўся з прафесійных, адказных і дысцыплінаваных
майстроў. Але ў любой арганізацыі ёсць людзі, якія сваёй стараннасцю і
працавітасцю паказваюць прыклад астатнім. Нядаўна іх партрэты былі
занесены на Дошку гонару прадпрыемства: механізатары Мікалай Бугаёў,
Віталь Грачышка, Уладзімір Калбасаў, кіроўца аўтамабіля Аляксандр
Матакоў, грузчык Аляксандр Ракуцiс, электрагазазваршчык Сяргей Яленскі,
токар Мікалай Кiршанкоў, рамшчык Аркадзь Гурскі, слесар-рамонтнік
дрэваапрацоўчага абсталявання Юрый Лабачоў.
Дзякуючы сукупнасці ўсіх фактараў ААТ «Дубровенскі райаграсэрвіс» застаецца надзейным памочнікам сельгаспрадпрыемстваў раёна.
Яна Гурская
Усе навіны