Хорошие соседи – отличные друзья

У нашым горадзе ўжо стала добрай традыцыяй праводзіць у летні час святы вуліц. Вось і нядаўняе свята было прысвечана вуліцы 70 год Кастрычніка, якая размешчана на ўскраіне Дуброўны і якую з-за аддаленасці яе ад цэнтра людзі ўмоўна празвалі “хутарам”.

Вуліца сапраўды ўнікальная сваімі жыхарамі. Пра многіх з іх можна апавядаць доўга. Практычна кожнай сям’і, якая пражывае тут, уласцівы такія якасці, як працалюбства (гэта красамоўна пацвярджаюць фасады іх дамоў і знешні выгляд прыдавамой тэрыторыі), дружалюбнасць (бачна па ўзаемаадносінах з суседзямі), і здольнасць жыхароў да творчасці. На апошняй якасці спынюся больш падрабязна, бо чым толькі не захапляюцца тут жыхары!

Напрыклад, пчалаводствам займаюцца Сяргей Зайцаў і Аляксандр Бяркозаў, разьбой па дрэве — Рыгор Шылаў, вырабам мяккай цацкі — Інэса Калеснікава, мастацкай самадзейнасцю — Людміла Машніцкіх і Вольга Ляховіч (удзельнікі шоу- праграмы “Супербабуля-2014”), Раіса Стальчанка (спявае ў хоры ветэранаў “Надзея”), Алеся Бяркозава (салістка народнай студыі эстраднай песні “Ліра”), вырошчваннем кветак і стварэннем ландшафных кветкавых кампазіцый — Людміла Шайтар (пераможца сёлетняга агля¬ду — конкурсу па добраўпарадкаванні домаўладанняў). І спіс талентаў з гэтай вуліцы можна працягваць яшчэ доўга…

Самымі першымі навасёламі, якія пасяліліся на вуліцы 70 год Кастрычніка амаль 30 гадоў назад, былі Віктар Сямёнавіч і Валянціна Іванаўна Шабанавы. Больш за 20 гадоў жывуць на гэтай вуліцы сем’і Ермаковых, Юхневічаў, Стальчанка, Шайтар, Зайцавых, Атрошкіных, Масейка. 16 год таму каля іх на гэтай вуліцы пасялілася сям’я Аляксандра і Святланы Шабека.

Самымі сталымі жыхарамі вуліцы з’яўляюцца Юлія Васільеўна Додрыкава і Антаніна Максімаўна Бірыч. Абе¬дзве бабулі, якія ўжо стаяць на парозе свайго 80-годдзя, прысутнічалі на свяце.

Была адзначана на свяце вуліцы і самая маладая сям’я. Гэта сям’я Аляксандра і Марыны Вычавых, дзе падрастае яшчэ зусім маленькая дачушка Ульянка.

Увесь час добра ладзяць з суседзямі, як, дарэчы, і сем’і Алтуховых, Тарасенкаў, Баркоўскіх, Чарнат, Лексаковых, пра іх таксама было ўпамянута на свяце і сказана шмат цёплых слоў у адрас гаспадароў, якія яны добразычлівыя людзі, клапатлівыя бацькі. Між іншым, Вольга Пятроўна Лексакова, якая працуе масажыстам ў райбальніцы, да таго ж выдатны кулінар-кандытар. Торт, які яна выпекла і прынесла на свята, быў прызнаны лепшым, а сама гаспадыня ўзнагароджана салодкім прызам.

Пасля таго, як была закончана канцэртная праграма, у якой акрамя ўзгаданых вышэй удзельнікаў, выступілі Анастасія Хмарская і Наталля Хахлова, Сяргей Петрыкаў, а займаліся яе падрыхтоўкай Крысціна Сіманькова і Юрый Аруцюнаў, жыхары з вуліцы 70 год Кастрычніка не спяшылі разыходзіцца па сваіх падвор’ях.

Сабраўшыся невялічкімі групамі, яны знаходзілі тэмы для размовы: успаміналі, як будаваліся, знаёміліся, пераймалі вопыт адзін у другога па добраўпарадкаванні падвор’яў, жанілі сыноў ці аддавалі замуж дачок. Гэтыя ўспаміны радавалі і сагравалі душу кожнага, яшчэ больш змацоўвалі і без таго моцныя суседскія сувязі. Усё як і належыць быць у харошых суседзяў.

Все новости