У Мінску стартаваў трэці сезон міжнароднага турніру па сучасным пяцібор'і "Кубак Паўла Ляднёва" з удзелам беларускіх і расійскіх спартсменаў, паведамляе карэспандэнт БЕЛТА.Праграму спаборніцтваў адкрывала кваліфікацыя мужчынскіх індывідуальных спаборніцтваў, на старт якой выйшлі 37 атлетаў. У першым паўфінале лепшы вынік у 1194 ачкі паказаў наш Уладзіслаў Бярозавік, яшчэ адзін беларус, Акім Гнедчык, размясціўся на сёмым месцы і таксама трапіў у лік удзельнікаў фіналу. З другога паўфіналу пуцёўкі ў вырашальны турнір таксама атрымалі двое нашых пяціборцаў - Уладзіслаў Жартун і Арцём Еўсцігнееў. Усяго за ўзнагароды 8 сакавіка будуць змагацца 18 спартсменаў, 14 з якіх прадстаўляюць Расію. Па-за медальнымі разборкамі засталіся 13 беларускіх спартсменаў.Заўтра на першым этапе Кубка Паўла Ляднёва адбудзецца кваліфікацыя ў жанчын, уладальніцы прызоў у асабістым заліку вызначацца ў суботу. Старт беларуска-расійскага турніру, які ўжо стаў традыцыйным, прапускаюць лідэры нашай нацыянальнай каманды - у гэтыя ж даты ў Каіры праходзіць дэбютны этап розыгрышу Кубка свету па сучасным пяцібор'і 2024 года: гэты старт з'яўляецца першым для беларусаў пасля вяртання на сусветную арэну.