У Дуброўне прэзентавалі аркестр робатаў

У STEAM-акадэміі сярэдняй школы №2 г. Дуброўна прайшла анлайн-прэзентацыя праекта «Аркестр робатаў», рэалізацыя якога стала магчымая пры падтрымцы Асацыяцыі «Адукацыя для будучыні» і кампаніі Gismart, беларуска-брытанскага распрацоўшчыка музычных прыкладанняў і гульняў. Кіраўнік STEAM-класа Вікторыя Карнеева распавяла, што ідэя аркестра з'явілася пасля наведвання вучнямі майстар-класа, які праходзіў у мінскім офісе кампаніі Gismart.

-Гэта быў цікавы праект, мабыць, адзін з самых феерычных сярод робататэхнічных праектаў, у якіх удзельнічалі вучні STEАM-класа, - падзялілася ўражаннямі Вікторыя Валер'еўна.

Асноўная частка была рэалізавана яшчэ ў канцы мінулага года, у далейшым ішла дапрацоўка і мадэрнізацыя робатаў. Дарэчы, сабраны яны з робататэхнічнага канструктара LEGOMindstormsEV3. У праекце ўдзельнічалі вучні ад 9 да 16 гадоў, працавалі яны ў групах: «Дэталька» - хлопцы-робататэхнікі, якія непасрэдна стваралі робатаў, «Пікселі» - афарміцелі, якія стварылі сцэну для вочнай прэзентацыі, «Нотка» - вакалісты, якія выступалі пад акампанемент аркестра , «Мадэлькі» - гурт малых, якія займаюцца 3D-мадэляваннем з паперы, для прэзентацыі яны стварылі стэнд папяровых музыкаў.

—Выбіраючы інструменты, на якіх павінен граць наш аркестр, мы аддалі перавагу шумавым, паколькі яны простыя ў засваенні. Нават чалавек без спецыяльнай адукацыі зможа прайграць мелодыю з іх дапамогай, таму для старту праекта яны падыходзілі ідэальна, - патлумачыла Вікторыя Карнеева.

Аркестр складаецца з шасці робатаў: Бубнач - грае на бляшаных банках і керамічных шкляначках, Цымбалюга - грае на дзіцячых цымбалах і металафоне, Суперпрофi - грае на бразготцы, а таксама стукае ў медныя кубкі і званiць у званочак, Трашчуля - грае на сапраўднай трашчотцы, Таўкачык - стукае лыжкай і таўкачыкам і Калакоша, які званiць у званочак. Аб'ядноўвае іх усіх робат-дырыжор Пётр Пятровіч.

Цікава, што спачатку ўсе робаты былі абязлічаныя. Ацэньваючы сваю працу, самі хлопцы - Павел Карнееў, Станіслаў Кляпіцкi, Максім Уладзімірэнка, Дзмітрый Селіханаў, Аляксандр Усаў, Радзівон Блажэвіч, Павел Белабрудаў і Андрэй Анісенка - вырашылі, што гэта сумна, таму дапрацавалі знешні выгляд, дадалі вочы з ультрагукавых датчыкаў, прыдумалі імёны і характары. Падчас прэзентацыі яны распавялі пра асаблівасці сваіх робатаў і тых цяжкасцях, з якімі сутыкнуліся падчас іх рэалізацыі.

Напрыклад, Аляксандр Усаў распавёў, што ў аркестр таксама павінен быў уваходзіць робат, які грае на драўлянай расчосцы. Але, калі праца над ім была завершана, аказалася, што з-за працуючага матора гуку практычна не чуваць. У выніку робата разабралі.

Ад першапачатковай ідэі прыйшлося адмовіцца і Станіславу Кляпіцкаму, стваральніку робата-дырыжора:

-Я хацеў, каб ён круціў галавой, але іншыя дэталі чапляліся за провад, таму пакінуў, як ёсць, - распавёў Станіслаў. - У мае абавязкі таксама ўваходзіла навучыць нашага настаўніка музыкі Марыну Міхайлаўну Гурскую складаць алгарытмы, выкарыстоўваючы блок чакання і блок гуку.

Менавіта ў робаце-дырыжору закладзена асноўная праграма. Ён дае каманды астатнім, каб робаты пачыналі або завяршалі свае партыі ў залежнасці ад кампазіцыі. У рэпертуары аркестра іх пакуль чатыры: беларускія народныя песні «Бульба», «Саўка ды Грышка», песня пра робата і кампазіцыя пра наш горад. Паміж сабой робаты звязаны праз Bluetooth.

-Аркестр робатаў - самы буйны праект у нашай школе. Але я б не сказаў, што ён быў складзены ў плане кода або робататэхнікі. Ён быў складзены ў плане каманднай працы, таму што мне трэба было каардынаваць астатніх, - з усмешкай прызнаўся Павел Карнееў. Ён таксама распрацоўваў робата Цымбалюгу, самага складанага па канструкцыі з усіх у праекце: у ім устаноўлена два матора, вялікі і маленькі, і выкарыстоўваюцца шасцярэнькі.

Хоць афіцыйная прэзентацыя адбылася толькі цяпер, у дубровенцаў ужо была магчымасць пачуць аркестр робатаў. Хлопцы дэманстравалі сваю распрацоўку на трэніровачным міжрэгіянальным хакатоне, праводзілі адкрытую дэманстрацыю для педагогаў раёна і ўдзельнічалі ў раённым конкурсе «Лепш за ўсіх», дзе аркестр выступаў разам з салістамі.

-Мы лічым, што калі праца выканана, то яе трэба паказваць, даваць выхад на гледача. Гэта дапамагае дзецям адчуваць аддачу, - патлумачыла Вікторыя Карнеева. - Таксама пасля дэманстрацыі з'явілася шмат жадаючых з іншых устаноў адукацыі, якія хацелі б займацца робататэхнікай, - дадала яна.

У далейшым удзельнікі STEAM-класа плануюць развіваць гэты праект. У наступным годзе яны збіраюцца адправіць яго на конкурсы інжынернага характару, на яго аснове будзе напісана даследчая праца. Таксама выказалася прапанова аб удзеле ў рэспубліканскім праекце «100 ідэй для Беларусі», аднак для гэтага наяўныя ўзоры неабходна дапрацаваць і дадаць новых функцый. Яшчэ адзін праект для рэалізацыі - стварэнне анлайн-рэсурсу. Гэтая ідэя таксама з'явілася пасля завяршэння аркестра робатаў:

-У нас захаваліся іх ЗD-мадэлі, і мы б хацелі падзяліцца імі, каб усе жадаючыя маглі паўтарыць нашых робатаў або іншыя нашы праекты, - дадала Вікторыя Карнеева.

Але ўсе гэтыя праекты будуць рэалізаваны ўжо ў новым годзе. Заняткі ў STEAM-акадэміі адновяцца пасля зімовых канікул, і яго ўдзельнікі зноў будуць радаваць дубровенцаў новымі праектамі.

Яна Гурская

Усе навіны