У Дуброўна прайшла акцыя «Дзень азелянення»

Ніхто за нас саміх не зробіць жыццё лепшым. Такое меркаванне выказваюць многія неабыякавыя дубровенцы, якія імкнуцца добраўпарадкоўваць не толькі тэрыторыі сваіх домаўладанняў, але і вуліцы, зялёныя зоны як у горадзе, так і ў сельскай мясцовасці. У межах экалагічнай кампаніі «Уладкуем малую радзіму» дарослыя і дзеці праводзяць суботнікі, высаджваюць дрэвы і хмызнякі, афармляюць клумбы, займаюцца афарбоўкай агароджаў і лавак, падтрымліваюць у належным стане месцы баявой і вайсковай славы.

Адным з такіх мерапрыемстваў стала акцыя «Дзень азелянення», якая прайшла пад дэвізам «Пасадзі дрэва». Арганізатарамі акцыі ў г.Дуброўна выступілі раённая інспекцыя прыродных рэсурсаў і аховы навакольнага асяроддзя, РК ГА «БРСМ» і аддзел загс Дубровенскага райвыканкама.

Удзельнікі дадзенай акцыі - сямейныя пары Ірыны і Аляксандра Сакаловых, Наталлі і Васіля Кураедавых, Ганны і Андрэя Сычовых, Святланы і Сяргея Крыжэвіч, Ганны і Андрэя Дудаўцавых, Алены і Мікалая Велейшыковых - сталі прадаўжальнікамі добрай традыцыі. Яны пасадзілі сваё дрэва на алеі сямейных дрэў імя Героя Савецкага Саюза Івана Габрусева на вуліцы Чырвонаармейскай.

Са словамі прывітання да ўдзельнікаў акцыі звярнулася Святлана Рыжанская, намеснік старшыні Дубровенскага райвыканкама. Яна падзякавала прысутным за ўдзел у экалагічнай кампаніі, актыўную грамадзянскую пазіцыю, любоў да сваёй малой радзімы і пажадала сямейнага дабрабыту, узаемаразумення і радасці ў дзецях.

А таксама прадставіла Андрэя Леанідавіча Завадскага, каардынатара праекта па добраўпарадкаванні тэрыторыі ў аг.Асiнторф, які таксама ўзяў удзел у акцыі і пасадзіў сваё фамільнае дрэва ў Дуброўне. Таццяна Шкiндэрава, першы сакратар Дубровенскага РК ГА «БРСМ» пазнаёміла з шлюбнымі парамі, распавяла пра стаж іх сумеснага жыцця і сямейныя традыцыi.

Затым усе разам пачалі пасадку дрэў. Сімвалічна, што ўдзельнікі акцыі высадзілі рабінкі, бо менавіта гэта дрэва са старажытных часоў лічыцца абярэгам ад бед і пошасцяў, з'яўляецца захавальнікам сямейнага дабрабыту. Здаўна славянам забаранялася секчы рабіну на дровы і ламаць яе галіны, каб не наклікаць няшчасце. Маладыя высаджвалі рабіну каля дома, а пасварыўшымся рэкамендавалі разам пасядзець пад рабінай.

Таццяна Шкiндэрава пажадала ўдзельнікам акцыі, каб рабінкі захоўвалі мір і дабрабыт у іх сем'ях. А на памяць аб удзеле ў экалагічнай акцыі ўручыла сертыфікаты. Прыемна адзначыць, што сярод удзельнікаў акцыі былі дзеці: гэта Данііл Крыжэвіч і Лізавета Дудаўцава. Яны разам з бацькамі пакінулі свой маленькі, але добры след на роднай дубровенскай зямлі.

Згадзіцеся, мала проста казаць пра любоў да роднай зямлі і таго месца, дзе мы жывем. Сваю любоў трэба пацвярджаць справамі і ўчынкамі. І такая магчымасць заўсёды знойдзецца. Напрыклад, толькі ў Віцебскай вобласці ў дзень азелянення было высаджана больш за 2,5 тысячы дрэў і кустоў. Па ўсёй Беларусі да 2 лістапада праходзіць месячнік па восеньскай пасадцы дрэў і хмызнякоў. Далучыцца да добрай справы па азеляненні малой радзімы можа кожны жадаючы ў любым населеным пункце.

Святлана ШУРПАКОВА

Усе навіны