06.12.2024

У Беларусі мяняецца заканадаўства па дзяржрэгістрацыі нерухомай маёмасці. Лукашэнка падпісаў новы закон

 

Прэзідэнт Беларусі Аляксандр Лукашэнка падпісаў закон "Аб змяненні законаў па пытаннях дзяржаўнай рэгістрацыі нерухомай маёмасці, правоў на яе і здзелак з ёю", які забяспечвае комплекснае і сістэмнае ўдасканаленне адносін у гэтай сферы. Аб гэтым БЕЛТА паведамілі ў прэс-службе беларускага лідара.

У прыватнасці, законам прадугледжваецца абавязковая дзяржаўная рэгістрацыя нерухомай маёмасці, правоў на яе і здзелак з ёю ў тэрмін не большы за 6 месяцаў, а па раней выдадзеных дакументах - да 1 студзеня 2031 года.

Грамадзяне змогуць атрымліваць пасведчанні аб дзяржрэгістрацыі непасрэдна ў натарыуса, які засведчыў або выдаў дакумент, што з'яўляецца падставай для рэгістрацыі, без неабходнасці дадатковага наведвання рэгістратара нерухомай маёмасці.

У Адзіны дзяржаўны рэгістр нерухомай маёмасці, правоў на яе і здзелак з ёю ў аўтаматычным рэжыме будуць уносіцца выпраўленні, звязаныя са змяненнем адрасоў аб'ектаў нерухомай маёмасці, персанальных даных грамадзян, ідэнтыфікацыйных звестак суб'ектаў гаспадарання, а таксама з пераходам правоў на нерухомую маёмасць у выпадку стварэння індывідуальным прадпрымальнікам камерцыйнай арганізацыі.

Законам таксама прадугледжаны экстэрытарыяльны прынцып рэгістрацыйных дзеянняў (незалежна ад месца знаходжання маёмасці), а таксама абавязковы дасудовы парадак абскарджання дзеянняў рэгістратара нерухомай маёмасці.

Акрамя таго, да 1 студзеня 2028 года падаўжаецца тэрмін звароту за легалізацыяй самавольна занятых зямельных участкаў.