17.06.2025

За цялятамі, як за малымі рабятамі…

Тым, хто не па чутках знаёмы з працай у жывёлагадоўчай галіне, не трэба тлумачыць, якіх намаганняў стояць вынікі працы чалавека, што штодня спяшаецца на ферму.

Бо гэта не канвеер, які ў любую хвіліну можна спыніць і забыцца аб працы на некалькі дзён. Гэта штодзённая цяжкая праца, з якой не кожны можа справіцца. А каб атрымаць аддачу ад жывёл, трэба прыкласці ўсе старанні і ўменні.

Попыт на жывёлагадоўчую прадукцыю, як мясную, так і малочную, расце. Значэнне гэтай галіны вызначаецца не толькі высокай доляй яе ў вытворчасці валавой прадукцыі, але і вялікім уплывам на эканоміку сельскай гаспадаркі ў цэлым. Прыбытковай галіна становіцца толькі пры правільным падыходзе да справы спецыялістаў, якія працуюць з жывёламі. Штодня на ферму ў в. Валеўкі спяшаецца Наталля Быля. Працоўны дзень у працавітай жанчыны пачынаецца ў 7 раніцы. Агледзеўшы падапечных, пачысціўшы кармавы стол, пачынае раздаваць кармы. Усё ў яе атрымліваецца спрытна і хутка. На апецы Наталлі Аляксандраўны больш за 50 цялят, і гэта не мяжа, бывае і па 70. Кожнаму трэба надаць увагу і кожнага трымаць пад наглядам, лічыць яна. Бо калі не заўважыш, што цяля дрэнна есць або прыхварэла, так і страціць яго нядоўга. Наталля Аляксандраўна ў сельскай гаспадарцы з 2004 года, пайшла па слядах бацькоў. Маці працавала аператарам машыннага даення, а бацька працаваў трактарыстам. Сельская праца ёй знаёма з дзяцінства. - Адзін час працавала на раздоі, а потым перайшла на дапрацоўванне. Вядома, адразу было няпроста, але да ўсяго абвыкаеш. Зараз прыбаўленні радуюць, па 700-800 грамаў у суткі, - распавядае Наталля Быля. - Пасля нараджэння цялят даглядаюць даяркі прыкладна два тыдні, іх кормяць малаком з соскi, а потым пераводзяць да мяне. Тут іх рацыён становіцца разнастайней. Ядуць камбікорм, сена і, вядома, малако, якое павінна быць абавязкова цёплым. Для падагрэву ў нас ёсць спецыяльны кіпяцільнік. Калі жывёлы дасягаюць масы 120-150 кг, іх пераводзяць у іншыя памяшканні або на комплекс.

Слухаю сваю суразмоўніцу і дзіўлюся: адкуль столькі духоўнай і фізічнай сілы ў гэтай жанчыне?! Бо не кожнаму пад сілу накарміць такую колькасць жывёлы, усім надаць увагу, каб кожны з іх меў добры прыбаўленне.

Сёлета партрэт Наталлі Аляксандраўны Быля заняў заслужанае месца на раённай Дошцы гонару.

dubrovno.by