02.09.2025

Юбілеі класікаў, цікавыя праекты, нацыянальная кухня. Што чакае гасцей Дня беларускага пісьменства

Пра тое, што падрыхтавалі арганізатары для правядзення Дня беларускага пісьменства ў Лідзе, распавёў журналістам намеснік міністра інфармацыі Дзяніс Язерскі.

Больш за 100 пісьменнікаў стануць удзельнікамі Дня беларускага пісьменства ў Лідзе. ХХХІІ Дзень беларускага пісьменства пройдзе ў Лідзе 6 і 7 верасня. У канцэпцыю свята сёлета ўключаны некалькі тэм: 80-годдзе Вялікай Перамогі, Год добраўпарадкавання, юбілейныя даты класікаў беларускай літаратуры, у тым ліку 500-годдзе з дня першай публікацыі кнігі "Апостал" Францыска Скарыны. "Гэтая тэма будзе чырвонай ніткай праходзіць на большай частцы пляцовак", - дадаў намеснік міністра.

"Дзень беларускага пісьменства - гэта яшчэ і шэраг мерапрыемстваў, якія ўжо стартавалі, і ў святочныя дні будуць падведзены вынікі. Так, 26 жніўня адбыліся фінал і запіс відэаверсіі рэспубліканскага конкурсу юных чытальнікаў "Жывая класіка". Упершыню адбудзецца гала-канцэрт "Жывой класікі" на цэнтральнай сцэне свята 6 верасня. Мы ўбачым пераможцаў розных гадоў гэтага фестывалю, цікава даведацца, кім яны сталі. І паверце, вельмі многія Імёны вам вядомыя", - адзначыў Дзяніс Язерскі.

На Дні беларускага пісьменства таксама пройдзе фестываль кнігі і прэсы. "У гэтым годзе ўвага фестывалю будзе нададзена рэгіёнам. Мы ўпершыню вылучым непасрэдна вялікімі павільёнамі рэгіянальныя пляцоўкі. Кожная вобласць прэзентуе свой літаратурны патэнцыял, свае навінкі ў кнігавыданні. Рэгіянальныя саюзы пісьменнікаў будуць шырока прадстаўлены дэлегацыямі пісьменнікаў. У аматараў літаратуры будзе магчымасць сустрэцца з імі, пагутарыць, будуць арганізаваны аўтограф-сесіі, - падкрэсліў намеснік міністра. - Гэта сур'ёзны крок, таму што мы заўсёды больш увагі надавалі рэспубліканскімі выдавецтвам і арганізацыям, якія задзейнічаны ў кнігавыдавецтве. Але ж не менш цікавае жыццё праходзіць у рэгіёнах, таму цікава раскрыць і паглядзець, што сёння цікавіць рэгіёны, чым яны жывуць".

"Вялікія пляцоўкі будуць адведзеныя грамадскім арганізацыям. Яны прэзентуюць свае праекты. Многія з іх вядомыя, яны праходзяць на працягу года. Але цікавым стане іх прадстаўленне на адной пляцоўцы, - акцэнтаваў увагу Дзяніс Язерскі. - Нашы літаратурныя музеі, мемарыяльныя музеі Якуба Коласа і Янкі Купалы, Нацыянальная бібліятэка рыхтуюць вялікія экспазіцыі. Будуць таксама працаваць пляцоўкі ўстаноў адукацыі, спорту".

У вялікай фуд-зоне госці свята змогуць пазнаёміцца з нацыянальнай кухняй.

"6 верасня пройдзе навукова-практычная канферэнцыя "Лідскія чытанні", якая традыцыйна праходзіць сумесна з НАН. Гэта даволі важкі ўклад у рэгіянальную навуку, таму што сёння спецыялістамі, навуковымі супрацоўнікамі Акадэміі навук вядзецца вялікая работа, якая ў рамках Дня пісьменства прадставіцца. Гэта скарбніца для далейшай работы мясцовых архівістаў, гісторыкаў. І ўсе гэтыя напрацоўкі пакідаюцца ў месцах правядзення Дзён беларускага пісьменства", — сказаў намеснік міністра.

У праграме свята - адкрыццё арт-аб'екта "Верабейкі". "Гэта цікавая архітэктурная форма, якая створана па вершы Валянціна Таўлая. Ён быў удзельнікам нацыянальна-вызвольнага руху ў Заходняй Беларусі, падпольшчыкам, удзельнікам ВАВ, паэтам, крытыкам, публіцыстам, перакладчыкам, арганізатарам стварэння некалькіх газет нашай краіны. Мы будзем пра яго шмат гаварыць на працягу ўсяго Дня беларускага пісьменства. Не абыдзем бокам і яго першы твор, які ўпрыгожыць сабой Замкавую плошчу ў Лідзе каля музея Таўлая", - адзначыў Дзяніс Язерскі. Аб'ект цікавы тым, што на ім размешчаны верш "Верабейкі" і звычайнымі літарамі, і таксама шрыфтам Брайля.

"Мы пастараліся ўключыць у праграму шмат напрамкаў, каб усе, хто прыедзе на свята, змаглі знайсці для сябе самае цікавае і правялі час з карысцю», - сказаў на заканчэнне намеснік міністра.

dubrovno.by