04.02.2026

У раённым Доме культуры прайшоў вялікі зімовы канцэрт

У завяршэнне першага месяца новага года ў раённым Доме культуры прайшоў вялікі зімовы канцэрт. Яркае, звонкае, таленавітае мерапрыемства стала ўжо традыцыйным у культурным календары Дубровеншчыны і з'яўляецца своеасаблівым справаздачным канцэртам лепшых творчых калектываў Дубровенскага раёна.

Сёлета раённы Дом культуры адзначае свой 75-гадовы юбілей, таму арганізатары зрабілі ўсё, каб ператварыць мерапрыемства ў запамінальнае маляўнічае відовішча. Канцэрт прайшоў у незвычайным фармаце: у выглядзе інтэрв'ю. Кожны з удзельнікаў канцэртнай праграмы адказваў на пытанні пра творчасць, натхненне і стаўленне да гледача.

Акрамя таго, у рамках мерапрыемства старшыня Віцебскай абласной арганізацыі РГА "Патрыёты Беларусі" Уладзімір Бабічаў уручыў членскія білеты дубровенцам, якія ўступілі ў гэтую арганізацыю.

Таксама былі падведзены вынікі агляду-конкурсу на лепшае навагодняе афармленне аб'ектаў сярод арганізацый, індывідуальных прадпрымальнікаў і ўладальнікаў прыватных жылых дамоў. Так, сярод арганізацый, індывідуальных прадпрымальнікаў першае месца заняло навагодняе афармленне будынкаў і тэрыторыі Дубровенскага РЭС. Другое месца — афармленне салона "Кропка прыгажосці" ІП Любові Курпатавай, трэцяе месца ў Дубровенскага раённага гісторыка-краязнаўчага музея. Сярод уладальнікаў індывідуальных дамоў абсалютным пераможцам прызнана Святлана Блізнякова з аг. Дабрынь, навагодні дызайн прысядзібных участкаў дубровенцаў Леаніда Ярмошкіна і Сяргея Гусянцова атрымалі другое і трэцяе месца адпаведна.

Зімовы канцэрт яшчэ раз паказаў, што дубровенцы — разнапланавыя людзі: яны ўмеюць працаваць, валодаюць незвычайнымі творчымі здольнасцямі і імкнуцца ствараць прыгажосць у сабе і вакол сябе, грэючы прамянямі свайго таленту, сваім мастацкім густам у гэтую марозную пару землякоў.

dubrovno.by