04.12.2025

У Дубровенскім РДК адбыўся тэматычны вечар "Мы разам"

У рамках мерапрыемстваў, прысвечаных Дню інвалідаў Рэспублікі Беларусь для людзей з абмежаванымі магчымасцямі ў РДК 3 снежня адбыўся тэматычны вечар "Мы разам".

З прывітальным словам выступіла загадчык аддзялення сацыяльнай рэабілітацыі, абілітацыі інвалідаў ТЦСАН Ірына Мацянко і старшыня раённай арганізацыі ТАА "БелТI" Клаўдзія Гарэлікава, выказаўшы павагу і ўдзячнасць людзям, якія паказваюць прыклад стойкасці і цярпення, мужнасці і жыццялюбства.

- Які б цяжкі ні выпаў чалавеку лёс - рукі апускаць не варта. Трэба заўсёды спадзявацца на лепшае, трэба верыць у сябе, смела ісці наперад, пераадольваць усе бар'еры і перашкоды. Ісці па жыцці трэба так, каб хацелася жыць, - заклікала прысутных Клаўдзія Гарэлікава.

Намеснік старшыні раённага аддзялення Беларускай партыі "Белая Русь" Алена Зайцава ўручыла падарунак РА ТАА "БелТI", а таксама выказала словы павагі людзям, якія пераадолелі цяжкасці на сваім жыццёвым шляху, за незвычайную сілу духу, мэтанакіраванасць і аптымізм.

- Упэўнена, што вы і ў далейшым будзеце прымаць актыўны ўдзел у грамадскім жыцці раёна і ўносіць свой уклад у яго развіццё. Жадаю вам здароўя, невычэрпнай жыццёвай энергіі, удачы і дабрабыту, - сказала яна.

У гэты дзень партыйны білет быў уручаны актывісту ветэранскага руху раёна, члену Беларускай партыі "Белая Русь" Анатолю Яўгенавічу Міхалевічу.

На сустрэчы таксама прысутнічалі валанцёры таварыства інвалідаў, яны падрыхтавалі падарункі гасцям, зробленыя сваімі рукамі. Яркім акцэнтам сустрэчы стала выстава работ, зробленых рукамі ўдзельнікаў народнай студыі "Сардэчныя сустрэчы". Іх творчасць - прыклад таго, як прыгожае дапамагае пераадольваць цяжкасці, а часам і ратуе ад засмучэння і надае сіл. Музычныя нумары ў гэты дзень прысутным падарылі Аляксандр Кароткін, Аляксандр Трапкоў і ўдзельнікі самадзейнасці раённага і сельскіх дамоў культуры. У сваю чаргу прадстаўнікі ТЦСАН павіншавалі актывіста БелТI, спартсмена і проста творчага чалавека Аляксандра Трапкова з 50-гадовым юбілеем.

Вясёлая музыка, зносіны і песні пад гітару, танцавальныя і вакальныя нумары, радасныя эмоцыі і сумеснае чаяванне аб'ядналі ўдзельнікаў мерапрыемства, падарыўшы зарад бадзёрасці і выдатнага настрою.

Таксама ў гэты дзень любы жадаючы змог вымераць артэрыяльны ціск і атрымаць кансультацыю медыцынскага работніка ЦРБ Таццяны Палікарпавай.

dubrovno.by