12.03.2026

У Дубровенскім раёне пачалі курсіраваць аўталакі "Еўраопт"

З 2 сакавіка ў Дубровенскім раёне пачалі курсіраваць два сучасныя аўтамагазіны ад ТАА "Еўрагандаль". Для жыхароў аддаленых вёсак гэта не проста навіна, а радасная падзея, якая наўпрост уплывае на якасць жыцця. Забяспечыць насельніцтва прадуктамі ў самым аддаленым кутку краіны - дзяржаўная задача, пазначаная Прэзідэнтам Рэспублікі Беларусь і замацаваная адпаведным указам.

У яе аснове — клопат аб сельскіх жыхарах, незалежна ад іх колькасці і аддаленасці населенага пункта. Сёння кампанія "Еўрагандаль" рэалізуе гэтую місію, пашыраючы сетку аўталавак і ахопліваючы новыя рэгіёны. Аўталаўкі "Еўраопт" працуюць у вёсках з рознай інфраструктурай: і там, дзе няма стацыянарнай крамы, і там, дзе гандлёвыя аб'екты не цалкам пакрываюць патрэбы жыхароў. Прычым маршруты ахопліваюць нават такія вёсачкі, дзе пражываюць адзін-два чалавекі, — туды рэгулярна прыязджае "крама на колах" з поўным асартыментам тавараў першай неабходнасці, забяспечваючы жыхароў тымі ж умовамі гандлю, што і ў горадзе.

У паўнавартаснай, але мініяцюрнай краме самаабслугоўвання, са стэлажамі і халадзільным абсталяваннем, пакупнік выбірае, што яму трэба, цалкам самастойна. Для зручнасці пакупак на ўваходзе ёсць прадуктовыя кошыкі.

У в. Чыжоўка пакупнікі выходзілі з аўталаўкі са шматлікімі пакупкамі.

— Уражанні — выдатныя. Вялікі асартымент тавараў, усё свежае, ды і цэны радуюць, — кажуць пакупнікі. — Дзякуй і за абслугоўванне, і за асартымент!

На касе наведвальнікаў разлічвае і вырабляе аплату кантралёр-касір Алена Мельнікава.

— Мая задача — абслугоўваць пакупнікоў, падказаць па асартыменце. Затым прывесці ў парадак вітрыну, папоўніць гандлёвыя стэлажы прадукцыяй да наступнага населенага пункта.

Па другім маршруце гандаль ажыццяўляе аналагічны аўтамагазін "Еўрыка". Безумоўна, крама на колах не заменіць стацыянарны гандлёвы аб'ект, але ў нейкай меры зможа задаволіць пакупніцкі попыт.