07.10.2020

Супрацоўнікі Дубровенскага РАУС праходзяць вакцынацыю ад грыпу

 

У Рэспубліцы Беларусь праходзіць прышчэпачная кампанія супраць грыпу, якая ў гэтым годзе абумоўлена асаблівымі ўмовамі - свет сутыкнуўся з каранавiрусам, распаўсюджванне якога прыняло пандэмічны характар. Небяспеку ўяўляе спалучэнне ў чалавека каранавiруснай інфекцыі і сезоннага грыпу. Абодва захворвання неспрыяльна ўздзейнічаюць перш за ўсё на лёгачную тканіну, выклікаючы пнеўманію. І COVID-19, і грып уяўляюць небяспеку для любога чалавека, але асабліва для людзей старэйшага ўзросту, цяжарных жанчын і людзей з любымі хранічнымі захворваннямі. Вакцынацыя дазваляе падрыхтавацца арганізму да эпідэміі, зрабіўшы яго менш успрымальным да віруса. Аднак прышчэпку неабходна рабіць загадзя, да пачатку ўздыму захворвання на ВРВІ і грып.

Супрацоўнікі Дубровенскага РАУС адны з першых прынялі ўдзел у кампаніі па вакцынацыі супраць грыпу. На ўласным прыкладзе прадстаўнікі дзяржаўнай структуры, якія забяспечваюць бяспеку грамадства, паказалі, што абсалютна дарэмна баяцца прышчэпкі, бо магчымыя пабочныя рэакцыі несувымерныя з той пагрозай, якую ўяўляе для арганізма грып. Ініцыятыву кіраўніцтва РАУС падтрымалі і астатнія супрацоўнікі. Прышчэпка з'яўляецца самым надзейным спосабам абароны ад грыпу. Яна дапамагае пазбегнуць захворвання або перахварэць ім у лёгкай форме.

Атрымаць прышчэпку супраць грыпу можна ў любой лячэбна-прафілактычнай установе па месцы жыхарства пры адсутнасці медыцынскіх супрацьпаказанняў або на прадпрыемстве, дзе прышчэпку зробіць медыцынскі работнік, які ўваходзіць у склад выязной прышчэпачнай брыгады. У дзень прышчэпкі абавязкова праводзіцца медыцынскі агляд і тэрмаметрыя. Паклапаціцеся пра сваё здароўе і здароўе сваіх блізкіх!

Юлія СТАРАВОЙТАВА