06.11.2025

Суботнікі прайшлі ў сельгаспрадпрыемствах Дубровеншчыны

У рамках выканання пастаўленай Прэзідэнтам Рэспублікі Беларусь Аляксандрам Лукашэнка задачы па навядзенні парадку ў АПК у Дубровенскім раёне праводзіцца сістэмная работа на аб'ектах сельгаспрадпрыемстваў, якія неабходна прывесці ў належны выгляд.

Да аказання дапамогі працаўнікам вёскі падключыліся прадпрыемствы раёна, удзельнікамі працоўных дэсантаў сталі прадстаўнікі кіраўнічага апарата, дэпутацкага корпуса, прафсаюзаў і грамадскасці, моладзь.

У мінулую суботу мы пабывалі ў трох сельгаспрадпрыемствах, дзе праходзіў вялікі санітарны дзень.

У ААТ "Праўда-С" працавалі работнікі Дубровенскага раёна электрычных сетак. У сельгаспрадпрыемстве ўзводзіцца гаспадарчым комплексам новы цялятнік.  Работнікі РЭС дапамаглі будбрыгадзе гаспадаркі разнесці піламатэрыялы для лачання даху цялятніка. А прадстаўнікі Малабахаўскага сельвыканкама дапамагалі ўцяпляць дзвярныя і аконныя праёмы кароўнікаў.

На МТФ "Сватошыцы" ААТ "Герой" нас сустрэў дружны роў касілак і пілы: пакуль работнікі лясгаса абкошвалі тэрыторыю вакол МТФ, работнікі разбіралі стары плёначнік для цялят.

— У нашым сельгаспрадпрыемстве пытанні навядзення парадку і добраўпарадкавання тэрыторыі МТФ на пастаянным кантролі. Мы штотыдзень праводзім "чысты чацвер": генеральную ўборку жывёлагадоўчых памяшканняў і тэрыторыі, — расказвае кіраўнік прадпрыемства Пётр Сыса, паказваючы выбеленыя кароўнікі. — Сёлета, паглядзіце, на тэрыторыі МТФ пасадзілі дрэўцы, туі, разбілі клумбы. Акрамя гэтага, абнавілі агароджы і ўязныя вароты, забетанавалі пляцоўкі для тэхнікі, забяспечылі прапускны рэжым з дэзактывацыяй транспарту: гэта неабходнасць з прычыны эпізаатычнай абстаноўкі.

Але, як і ў кожнага гаспадара, кожны дзень знойдзецца, дзе паправіць, а дзе пачысціць. Так і ў суботні дзень на тэрыторыі МТФ "Сватошыцы" працавалі не толькі памочнікі — работнікі культуры, але і ўсе даяркі, спецыялісты заатэхнічны службы, будаўнічая брыгада, работнікі канторы.

— Разабралі стары плёначнік, усе дровы распілавалі і развезлі для выкарыстання пры абаграванні службовых памяшканняў, падрыхтавалі пляцоўку і хутка пачнем будаваць новы. Навялі парадак, абкасілі — дарэчы, сёлета ўжо 4-ы раз — тэрыторыю і прыдарожныя адхоны каля ферм. Адрамантавалі, дзе неабходна, дах. Усе работы планавыя, сістэмныя, не для паказухі, а для таго, каб працаваць і атрымліваць добрае малако, — запэўніў Пётр Сыса.

dubrovno.by