12.05.2025

Сотні людзей прыйшлі на мемарыяльны комплекс "Рыленкі" пакланіцца подзвігу народа

Традыцыйна ў гэты дзень на мемарыяльным комплексе "Рыленкі" сабраліся сотні людзей, каб ушанаваць памяць больш за 9 тысяч савецкіх воінаў, якія назаўсёды засталіся ў беларускай зямлі.

Вялікая Айчынная вайна - адна з самых трагічных і ў той жа час гераічных старонак у гісторыі нашай краіны. Яна забрала жыцці мільёнаў людзей, але таксама стала сведчаннем мужнасці і стойкасці савецкага народа. Больш за 80 гадоў прайшло з моманту вызвалення Беларусі ад нямецка-фашысцкіх захопнікаў, але штогод у ходзе палявых пошукавых работ на месцах баявых дзеянняў выяўляюцца астанкі чырвонаармейцаў, якія аддалі сваё жыццё за вызваленне Радзімы. Толькі ў 2024 годзе на тэрыторыі Дубровенскага раёна пошукавікамі былі ўзняты астанкі 63 савецкіх воінаў.

— Мы памятаем аб дубровіцах, якія не вярнуліся з вайны, мы ўдзячныя нашым землякам, якія вынеслі ўсе нягоды вайны ў тыле ворага і аднавілі наш раён пасля фашысцкай акупацыі. Не сціхае боль аб тых, хто загінуў на палях бітваў, памёр ад ран у шпіталях, у нацысцкіх канцлагерах, прапаў без вестак.

Будзем жа памятаць пра подзвігі нашых землякоў! Яны загінулі за нашу будучыню, наша шчасце.

Захаванне памяці аб падзеях Вялікай Айчыннай вайны - гэта не толькі даніна павагі да мінулага, але і важны крок да будучыні. Мы павінны вучыцца на ўроках гісторыі, каб пазбегнуць паўтарэння трагічных памылак, каб новыя пакаленні ўсвядомілі кошт мірнага жыцця і неабходнасць берагчы яго, - звярнуў увагу ў сваёй прамове старшыня райвыканкама Анатоль Лукашоў.

dubrovno.by