18.08.2025

Старшыня Віцебскага аблвыканкама Аляксандр Субоцін прадставіў новага кіраўніка Дубровенскага раёна

18 жніўня адбылася пазачарговая сесія раённага Савета дэпутатаў. На ёй зацвердзілі на пасадзе новага старшыню райвыканкама Алега Макарэвіча.

Алег Макарэвіч нарадзіўся ў 1974 годзе ў Аршанскім раёне. Скончыў механіка-тэхналагічны тэхнікум у Оршы, а таксама Санкт-Пецярбургскі дзяржаўны інстытут сэрвісу і эканомікі. Мае досвед працы ў кіраўніцкай галіне, з'яўляўся дырэктарам адкрытага акцыянернага таварыства "Маяк Высокае". Да сённяшняга дня ўзначальваў Сенненскі райвыканкам.

Прадстаўляючы актыву раёна новага кіраўніка, старшыня Віцебскага абласнога выканаўчага камітэта Аляксандр Субоцін звярнуўся да Алега Макарэвіча:

— Раён для вас не чужы, вы тут недалёка нарадзіліся. Зямлі вам вядомыя, людзі - выдатныя. Я думаю, усё ў вас павінна атрымацца. Чакаем ад вас рэкордаў!

У сваю чаргу Алег Макарэвіч падзякаваў дэпутацкаму корпусу раёна за аказаны давер і падзяліўся сваім бачаннем таго, якія першачарговыя задачы трэба будзе вырашыць раёну ў бліжэйшы час.

— Перш за ўсё, пастараемся максімальна хутка разабрацца ў галіне жывёлагадоўлі. Тут, на мой погляд, хаваецца дастаткова сур'ёзны патэнцыял. Вопыт у гэтым напрамку ў мяне ёсць, таму, у першую чаргу, асаблівая ўвага менавіта жывёлагадоўчай галіне. Таксама ў прыярытэтных задачах - паляпшэнне якасных паказчыкаў зямлі: урадлівасць глеб, контурнасць палёў. Бо не сакрэт, у планах развіцця Віцебскай вобласці на Дубровенскі раён робіцца пэўная стаўка. Патэнцыял у раёна вялікі, яго трэба развіваць, - лічыць Алег Макарэвіч.

Кіраўнік рэгіёна і старшыня раённага Савета дэпутатаў Алена Ціханава падзякавалі экс-старшыні Дубровенскага райвыканкама Анатолю Лукашову, які больш за 17 гадоў кіраваў раёнам, выказалі словы падзякі за добрасумленную працу і ўручылі Ганаровыя граматы.

dubrovno.by