04.12.2025

Моладзь Дубровеншчыны прадставіла ініцыятывы па добраўпарадкаванні горада на абласным конкурсе

Дубровенцы падрыхтавалі некалькі маладзёжных ініцыятыў і прадставілі іх на абласным конкурсе праектаў у Віцебску ў рамках конкурсу "Праектуй будучыню".

Лепшыя з прадстаўленых ініцыятыў маладых людзей Віцебскай вобласці, уключаючы дубровенцаў, атрымалі магчымасць прайсці ў наступны этап конкурсу, які адбудзецца ў Мінску. Гэтыя праекты ахопліваюць розныя напрамкі развіцця культурнай і сацыяльнай актыўнасці моладзі, адлюстроўваючы творчы патэнцыял рэгіёну.

Сярод праектаў дубровенцаў - стварэнне маладзёжнага медыяцэнтра пры цэнтральнай раённай бібліятэцы імя А.А. Дударава. Натхняльнікам дадзенай ідэі з'яўляецца Ганна Скварко, дырэктар Дубровенскай цэнтралізаванай бібліятэчнай сістэмы.

- Мы вырашылі арганізаваць камфортнае асяроддзе для раскрыцця творчага і інтэлектуальнага патэнцыялу навучэнцаў і моладзі праз фарміраванне груп па інтарэсах для сумеснай дзейнасці. Перавагі медыяцэнтра: работа ў новым фармаце. Пры выбары тэматыкі мерапрыемстваў асаблівую ўвагу будзем надаваць іх густам і перавагам. Спадзяемся, што ў падрыхтоўцы і правядзенні будуць удзельнічаць самі юнакі і дзяўчаты, што створыць "сваю" атмасферу. Медыяцэнтр "Прасоўванне. Стрым" стане сучаснай пляцоўкай для творчасці, зносін і развіцця моладзі і кожны тут зможа рэалізаваць свае ідэі і праекты, - упэўнена Ганна Міхайлаўна.

Наступны праект прадставіў Даніла Міхальчанка, старшыня Дубровенскага раённага савета працоўнай моладзі, настаўнік фізічнай культуры і здароўя сярэдняй школы №1 г. Дуброўна ім. А.А. Нікандравай.

Варкаўт-пляцоўку для ўсёй сям'і плануецца ўсталяваць на тэрыторыі спецыялізаванай вучэбна-спартыўнай установы "Дубровенская дзіцяча-юнацкая спартыўная школа". Комплекс прызначаны для развіцця сілы, гнуткасці і цягавітасці, прапаноўваючы бясплатны і даступны фармат фізічнай актыўнасці.

- Думаю, новы спартыўны комплекс будзе спрыяць актыўнаму ладу жыцця, дазваляючы займацца спортам у любым узросце і на любым узроўні падрыхтоўкі. На пляцоўку змогуць прыходзіць сем'ямі, займацца спортам на свежым паветры. Падтрымку акажа УП ЖКГ "Дуброўна Камунальнік", якое дапаможа ўсталяваць трэнажоры і добраўпарадкаваць тэрыторыю, — распавёў лідар савета працоўнай моладзі.

Чарговы праект АРТ-ПРАСТОРА "Кватэрнік".

Кіраўнік праекта Вікторыя Храмцова, дырэктар раённага цэнтра народнай творчасці і культурна-дасугавай дзейнасці Дубровенскага раёна, адзначыла, што яна даўно хацела, каб у моладзі з'явілася яшчэ адно месца для рэалізацыі сваіх музычных, паэтычных, мастацкіх, вакальных і прамоўніцкіх здольнасцяў.

- Гэта новы фармат інтэлектуальных зносін і далучэння да мастацтва. Ён будзе спрыяць развіццю ўпэўненасці, эмацыйнаму і інтэлектуальнаму росту маладых людзей, уменню ўзаемадзейнічаць у калектыве. Арганізацыя вечароў для культурнага баўлення часу моладзі будзе праводзіцца ў пераўтворанай танцавальнай зале раённага Дома культуры.

Аўтарам яшчэ аднаго праекта па адкрыцці кінатэатра пад адкрытым небам стала дубровенка, член камісіі па пытаннях культуры і міжнацыянальных адносін маладзёжнага савета пры Савеце Рэспублікі Нацыянальнага сходу Рэспублікі Беларусь Марыя Сабалеўская. Яе падтрымаў мясцовы малады прадпрымальнік Аляксандр Вялейшыкаў. Яны прапануюць у парку "Ліпкі" ўсталяваць аб'ёмныя светавыя літары з назвай парку, якія стануць яркай славутасцю і месцам для фота. Літары будуць выраблены з трывалых матэрыялаў з LED падсветкай, якая працуе ад энергазберагальных крыніц. Праект таксама прадугледжвае ўстаноўку вялікага экрана і гукавога абсталявання для паказу фільмаў і арганізацыі розных мерапрыемстваў: тэматычных вечароў, майстар-класаў і канцэртаў.

- Моладзь Дубровеншчыны і турысты раёна атрымаюць яшчэ адно месца для адпачынку і забаў на свежым паветры. Дарэчы, гэта палепшыць эстэтычнае ўспрыманне гарадской прасторы, павысіць пазнавальнасць парку і створыць прывабную атмасферу ў вячэрні час для наведвальнікаў. А яшчэ абноўлены парк стане месцам для крэатыўных фота, што павысіць папулярнасць парку ў сацсетках, новым месцам для сустрэч і зносін.

Такім чынам, дубровенскія маладзёжныя праекты ўяўляюць сабой частку шырокай праграмы падтрымкі і развіцця маладзёжных ініцыятыў у Беларусі. Прэзентацыі праектаў дубровенцаў на абласным этапе конкурсу пацвердзілі іх высокі ўзровень і актуальнасць.

Будзем спадзяецца, што ініцыятывы нашай моладзі апынуцца ў ліку пераможцаў на рэспубліканскім этапе ў Мінску і будуць рэалізаваны.

dubrovno.by