23.09.2025

Мехатрад ААТ "Дубровенскі райаграсэрвіс" дапамагае сельгаспрадпрыемствам

Па-ранейшаму напружаны графік работ у механізаванага атрада, створанага на базе ААТ "Дубровенскі райаграсэрвіс"

Як распавёў Дзмітрый Цімошчанка, дырэктар ААТ "Дубровенскі райаграсэрвіс", мехатрад таксама аказвае дапамогу Сенненскаму раёну, дзе задзейнічаны МТЗ 3522 на ворыве, а ў Лёзненскім — КВК-800 на ўборцы кукурузы. Але асноўны фронт работ - на палях Дубровенскага раёна. Механізатары займаюцца ўзворваннем і культывацыяй глебы, косяць і зграбаюць травы, нарыхтоўваюць кукурузны сілас, праводзяць хімапрацоўку і вывозяць арганіку.

- Узворванне палёў, апрацоўка глебы і пасеў — найважнейшыя агратэхнічныя прыёмы земляробства. Менавіта яны ствараюць умовы, у якіх растуць і ў далейшым развіваюцца расліны ў глебе. Якасная апрацоўка зямлі — гарант павышэння эфектыўнасці яе ўрадлівасці і ўраджайнасці культур, — кажа Дзмітрый Уладзіміравіч. Механізатары працуюць у аптымальным тэмпе, каб выканаць усе работы ў тэрмін.

На полі блізу аг. Ерамееўшчына працуе новенькі МТЗ-3522 з васьмі карпуснымі плугамі Lemken Diamant 11 пад кіраваннем дасведчанага механізатара Аляксандра Галаднёва.

- Якаснае і своечасовае ўзворванне — гэта пачатак пачаткаў, залог добрага ўраджаю. Задача, якая ў гэтыя дні стаіць перад намі, толькі на першы погляд простая. Але вопыт работы на зямлі сведчыць, што ворыва — гэта вялікая і адказная праца. Важна, каб поле пасля ўзворвання было роўным, не было агрэхаў, каб абза была роўнай і ўзаранай. Гэта трэба для таго, каб на кожны сантыметр плошчы трапіў пасяўны матэрыял і даў добрыя ўсходы, — кажа механізатар. — Пры добрым надвор'і атрымоўваецца апрацоўваць па 20-25 га ў дзень. Зусім хутка тут пройдуць сеялкі.

На падрыхтоўцы глебы пад азімую сяўбу ў ААТ "Усход-Чырына" працуе Павел Калбасаў на МТЗ-3522 з дыскатарам, а ў КУСГП "Зарубы" на МТЗ-3522 у счэпцы з КГП 6 — Андрэй Юранаў. Закладваючы падмурак будучага ўраджаю, не забываюць аграрыі і пра нарыхтоўку кармоў.

На полі блізу аг. Станіславова мы назіралі за працай Сяргея Астапенкі. На МТЗ-3522 у счэпцы з модульнай ратацыйнай касілкай КПР-9 ён займаецца касьбой траў і штодня перавыконвае даведзеныя нормы. У перапынак на абед ён падзяліўся:

- Травы ў нас сёлета выдатныя, ураджай добры. Прыбіраем дзесьці па 40 га ў дзень. Тэхніка сучасная, камп'ютарызаваная, працаваць на такой адно задавальненне, — адзначыў Сяргей Астапенка.

Сярод тых, хто варушыць і зграбае ў валкі травы, дамагаючыся пры гэтым высокіх вынікаў, Анатоль Рабчыкаў. Працуе ён на трактары МТЗ-82 у счэпцы з колапальцавымі граблямі ГВР-9,6.

- У мяне не такі магутны трактар, як у маіх калег, але ён не падводзіць і заўсёды на хаду, — дзяліўся механізатар. — Працую з шыроказахопнымі граблямі з пачатку корманарыхтоўчай кампаніі. Травы тут выраслі сакавітыя, таму сельгаспрадпрыемства будзе з кармамі.

Акрамя нарыхтоўкі траў, задзейнічаны мехатрад і на адвозцы кукурузнай масы ў КУСГП "Прыдняпроўскі". Там працуе два аўтамабілі МАЗ і МТЗ-1221 з ПС-45. Унясенне фосфарных угнаенняў пад азімую сяўбу праходзіць у ААТ "Усход-Чырына". На МТЗ 1221 з РУ-7000 Аляксандр Чарнаморцаў апрацоўвае 70-80 га. На палях ААТ "Баброва-Агра" і СХФ ім. Ю. Смірнова ўносяць даламіт. Хутка завершыцца першы сельскагаспадарчы цыкл, у якім міжраённы мехатрад ААТ "Дубровенскі райаграсэрвіс" забяспечваў увесь спектр агратэхнічных работ. І гэты вопыт паказвае, што падтрыманая ініцыятыва Прэзідэнта па стварэнні такіх структур апраўдвае сябе: добрая тэхніка, адказныя работнікі, своечасовае і якаснае выкананне ўсіх неабходных аперацый значна паляпшаюць эфектыўнасць земляробства.

dubrovno.by