08.10.2025

Два важныя пытанні разгледзелі на чарговым пасяджэнні Дубровенскага райвыканкама

Два важныя пытанні разгледзелі на чарговым пасяджэнні Дубровенскага раённага выканаўчага камітэта. Удзел у пасяджэнні прыняў пракурор раёна Аляксандр Філёненка.

Першае з іх тычылася выканання зямельнага заканадаўства і ажыццяўлення дзяржаўнага кантролю за выкарыстаннем і аховай зямель.

Кіраўнік раёна Алег Макарэвіч адзначыў, што работа ў гэтым кірунку павінна весціся без фармалізму, патрэбныя канкрэтныя вынікі.

— Дубровенскі раён славіцца людзьмі працоўнай загартоўкі, не адно сельгаспрадпрыемства мае дастаткова высокую культуру земляробства. Тым не менш, дакладную стратэгію, як пісьменна і эфектыўна распарадзіцца ўсімі не выкарыстоўваемымі землямі, з улікам канкрэтных тэрмінаў на рашэнне гэтай задачы, трэба будзе яшчэ распрацаваць, — пазначыў старшыня райвыканкама. — А значыць, зацікаўленым службам трэба будзе добра прадумаць план сумесных дзеянняў і сістэму кантролю за іх выкананнем. Мала прыняць рашэнне па кожным факце, яго важна давесці да лагічнага завяршэння.

Начальнік аддзела землеўпарадкавання Лізавета Мінькова праінфармавала прысутных аб рабоце, якая праводзіцца ў раёне па гэтым пытанні. Яна адзначыла, што супрацоўнікамі аддзела толькі ў бягучым годзе разгледжана і накіравана ў арганізацыі 129 заяў аб канфіскацыі і прадастаўленні зямельных участкаў, 267 матэрыялаў тычыліся фізічных і юрыдычных асоб. Праводзіцца работа па пераразмеркаванні сельскагаспадарчых зямель з мэтай рацыянальнага і эфектыўнага іх выкарыстання. У карыстанні сельскагаспадарчых арганізацый маюцца плошчы ў такой колькасці, якія яны ў сілах рацыянальна і эфектыўна выкарыстоўваць для вядзення рэнтабельнай вытворчасці.

— За 2025 год пераразмеркавана 241 га зямель, з іх больш за 100 га невыкарыстоўваемых зямель уцягнутыя ў сельгасабарот. Вялікая работа праводзіцца па зносе пустуючых дамоў. Так, за 8 месяцаў знесена 48 будынкаў, размешчаных на зямельных участках плошчай 8, 6 га. Найбольшая колькасць пустуючых дамоў знесена ў Зарубскiм, Дабрынскім і Валеўкаўскім сельсаветах, — распавяла Лізавета Мінькова.

Асобна падчас пасяджэння спыніліся і на пытаннях ажыццяўлення дзяржкантролю за аховай і выкарыстаннем зямель. Быў зроблены акцэнт, што ў адпаведнасці з заканадаўствам, у дачыненні да парушальнікаў землекарыстання прадугледжаны розныя меры ўздзеяння: ад вуснай заўвагі да адміністрацыйнага штрафу. У ліку найбольш распаўсюджаных парушэнняў зямельнага заканадаўства названы: невыкарыстанне ўчасткаў на працягу ўстаноўленых тэрмінаў, неэфектыўнае выкарыстанне і зарастанне зямлі драўняна-хмызняковай расліннасцю і пустазеллем, а таксама самавольны занятак зямельных участкаў. — За мінулы перыяд спецыялістамі землеўпарадкавальнай службы выраблена 405 абследаванняў зямельных участкаў на прадмет выканання зямельнага заканадаўства, — адзначыла начальнік аддзела землеўпарадкавання. — Аформлена 42 адміністрацыйныя справы, вынесена дзве пастановы аб накладанні адміністрацыйнага спагнання і 36 пастаноў з вынясеннем папярэджанняў. Выдадзена 103 прадпісанні аб ліквідацыі парушэнняў.

Дакладчык адзначыла, што ў раёне ўсе, хто мае патрэбу, забяспечваюцца зямельнымі ўчасткамі, чарговасць адсутнічае. Інфармацыя аб наяўнасці свабодных (не занятых) зямельных участкаў размешчана на сайце райвыканкама і абнаўляецца штомесяц. На пасяджэнні таксама было адзначана, што аддзелам землеўпарадкавання праводзіцца тлумачальная работа з грамадзянамі аб парадку афармлення (легалізацыі) самавольна занятых участкаў, якіх у Дубровенскім раёне налічваецца 244. У сувязі з прадаўжэннем тэрміну афармлення такіх участкаў да 1 студзеня 2028 года сумесная работа аддзела з сельвыканкамамі ў гэтым на кiрунку працягваецца.

Пра тое, якія меры па ўмацаванні грамадскай бяспекі і дысцыпліны ў частцы папярэджання гібелі людзей ад знешніх прычын далажыла на пасяджэнні намеснік старшыні райвыканкама Святлана Рыжанская. Сярод выступоўцаў па гэтай тэме таксама былі начальнікі РАНС і РАУС Максім Куляшоў і Сяргей Клец. Адзначана, што дзякуючы сумесным намаганням суб'ектаў прафілактыкі, сістэмнаму выкананню наглядных і каардынацыйных мерапрыемстваў сітуацыя ў раёне застаецца стабільнай. Аднак, як падкрэслілі ўдзельнікі пасяджэння, з надыходам асенне-зімовага перыяду неабходна ўзмацніць кантроль за выкананнем узроўню гатоўнасці дарожных і камунальных служб да выканання ўскладзеных на іх задач па ўтрыманню вулічна-дарожнай сеткі, забеспячэнню нармальнай работы тэхнічных сродкаў арганізацыі дарожнага руху, функцыянаванню вонкавага асвятлення, а таксама на больш цеснае ўзаемадзеянне з назіральнымі камісіямі пры сельскіх выканкамах, асабліва падчас ацяпляльнага перыяду.

— Асаблівую ўвагу трэба надаць супрацьпажарнаму стану дамоў і кватэр, дзе пражываюць адзінокія, састарэлыя грамадзяне, інваліды, шматдзетныя сем'і, а таксама сем'і, у якіх дзеці знаходзяцца ў сацыяльна небяспечным становішчы, іншыя ўразлівыя катэгорыі грамадзян, — звярнула ўвагу Святлана Рыжанская.

Звяртаючыся да ўдзельнікаў пасяджэння, пракурор Аляксандр Філёненка падкрэсліў і важнасць узмацнення процідзеяння алкагалізацыі насельніцтва.

— Кампетэнтным службам неабходна больш актыўна праводзіць грамадскую і індывідуальную прафілактычную работу ў гэтым напрамку, у тым ліку з асобамі, якія стаяць на ўліку ў РАУС. Неабходна больш эфектыўна выяўляць "бытавое" п'янства, асабліва ў сем'ях, якія выхоўваюць дзяцей, — звярнуў увагу пракурор.

Па выніках работы пасяджэння Алег Макарэвіч прапанаваў узяць за аснову праект рашэння райвыканкама з дапаўненнямі і дакладнымі тэрмінамі выканання даручэнняў.

— Прэзідэнт неаднаразова падкрэслівае, што пытанні бяспекі і дысцыпліны заўсёды ў прыярытэце. Таму самае важнае — работа з людзьмі. Выканальніцкая дысцыпліна і справядлівы падыход да адказнасці за яе парушэнне — вось што дапаможа дамагчыся выніку. Так, гэта складана, і такія меры непапулярныя. Але ў нас з вамі няма іншага выйсця, — рэзюмаваў старшыня райвыканкама.

dubrovno.by