16.10.2025

Дубровенцы далучыліся да Адзінага дня азелянення

Даказана, што зялёныя зоны не толькі ўпрыгожваюць гарады, але і выконваюць важныя экалагічныя функцыі, такія як абарона глебы і вады ад забруджванняў, зніжэнне ўзроўню шуму, паляпшэнне якасці паветра і стварэнне спрыяльных і камфортных умоў для гараджан.

11 кастрычніка ў рэспубліцы адбыліся два маштабныя экалагічныя мерапрыемствы: Адзіны дзень азелянення і старт акцыі "Дай лесу новае жыццё". У Дуброўне ў Адзіны дзень азелянення шматлікі працоўны дэсант працаваў у мікрараёне шматпавярховай забудовы па вуліцы Аршанская. Высадзіць дрэвы выйшлі спецыялісты Дубровенскага райвыканкама на чале са старшынёй Алегам Макарэвічам, старшынёй Дубровенскага раённага Савета дэпутатаў Аленай Ціханавай, супрацоўнікамi прадпрыемстваў, прадстаўнікамi арганізацый сілавых і прыродаахоўнага ведамстваў, устаноў адукацыі горада, грамадскасцю і мясцовымi жыхарамi. Падчас акцыі высаджана 150 дрэў клёну і ясеня, створаны кампазіцыі з 30 кустоў ядлоўца і самшыта.

Як распавёў начальнік Дубровенскай раённай інспекцыі прыродных рэсурсаў і аховы навакольнага асяроддзя Уладзімір Вялейшыкаў, новая зялёная зона з'явілася і ў раёне 3-га Шклоўскага завулка. Там таксама былі высаджаны 150 лісцяных дрэў. У цэлым ён адзначыў, што пасадка зялёных насаджэнняў працягнецца да сярэдзіны лістапада.

Дарэчы, з 11 па 31 кастрычніка ў Беларусі праводзіцца акцыя "Дай лесу новае жыццё". Яна накіравана на папулярызацыю лясной галіны і аднаўленне пашкоджаных участкаў ляснога фонду, у тым ліку пацярпелых ад моцных вятроў.

На тэрыторыі Віцебскай вобласці плануецца аднавіць лясы на плошчы каля 150 га, а таксама дапоўніць раней створаныя лясныя насаджэнні на плошчы не менш за 2 тыс. га. Будзе высаджана каля 2 млн. сеянцоў і саджанцаў асноўных лесаўтваральных парод: хвоі, елкі, бярозы, а таксама дуба, ясеня і клёну. Ініцыятыва стала чарговым напамінам аб тым, што клопат аб прыродзе пачынаецца з кожнага з нас. Штогод расце не толькі колькасць удзельнікаў акцыі, але і ўсведамленне важнасці азелянення для паляпшэння якасці жыцця. Такія мерапрыемствы аб'яднаны агульнай мэтай - ствараць камфортнае і экалагічна чыстае асяроддзе для будучых пакаленняў. Сумесная работа падчас такіх акцый - магчымасць зрабіць нашу краіну камфортней і прыгажэй.

dubrovno.by