05.05.2025

Дэлегацыя Дубровенскага раёна прыняла ўдзел у абласной патрыятычнай акцыі "Прарыў Перамогі"

Галоўныя мерапрыемствы абласной патрыятычнай акцыі "Прарыў Перамогі" адбыліся на мемарыяльным комплексе, прысвечаным гераічнай старонцы ў гісторыі Вялікай Айчыннай вайны, калі ў першых чыслах мая 1944-га, за год да Вялікай Перамогі, партызаны Полацка-Лепельскай зоны разарвалі вогненнае кальцо ворага і вывелі з блакады 15 тысяч мірных жыхароў.

У мітынгу, прымеркаваным да 81-й гадавіны прарыву варожай блакады, прынялі ўдзел кіраўніцтва вобласці і Ушацкага раёна, прадстаўнікі ўсіх рэгіёнаў Віцебшчыны, дэлегацыя са Смаленскай і Пскоўскай абласцей, Казахстана.

- Месца нашай сустрэчы мае глыбока сімвалічнае значэнне. Напярэдадні Дня Перамогі, мы сабраліся ля мемарыяла "Прарыў", каб аддаць даніну памяці і павагі тым, хто змагаўся і працаваў на карысць нашай Радзімы ў гады Вялікай Айчыннай вайны. Гэтая зямля, дзе пралівалася кроў нашых бацькоў і дзядоў, стала знакам мужнасці і стойкасці, — адзначыў старшыня аблвыканкама Аляксандр Субоцін.

Кіраўнік вобласці падкрэсліў, што прарыў варожай блакады партызанамі Полацка — Лепельскай зоны — унікальная з'ява ў гісторыі партызанскага руху Беларусі. З дапамогай добра ўзброенай шасцідзесяцітысячнай групоўкі ў складзе дванаццаці нямецкіх палкоў СС і паліцыі, частак пяці пяхотных дывізій, авіяпалявой і трох ахоўных дывізій фашысты разлічвалі пакончыць з партызанскай зонай за 5 дзён. Але не 5, а 25 дзён сцягвалася блакаднае кальцо, партызаны вялі цяжкія кровапралітныя баі, вымотваючы сілы ворага, адцягваючы на сябе ўсё новыя і новыя падраздзяленні нямецкіх войскаў. Значнасць іх подзвігу немагчыма пераацаніць. Прарыў спрыяў наступнаму поспеху Віцебска-Аршанскай і асабліва Полацкай наступальнай аперацый падчас вызвалення Беларусі.

Памяць аб гераічным подзвігу нашых продкаў — аснова духоўнага адзінства беларускага народа. Сімвалічна, што ў шэрагах аднаго з партызанскіх атрадаў разрываў кальцо блакады разведчык, ураджэнец Смаленшчыны Міхаіл Ягораў, які пасля ўзняў сцяг перамогі над Рэйхстагам. Аляксандр Субоцін падзякаваў прадстаўнікам расійскай дэлегацыі, якія падтрымалі акцыю і тым самым падкрэслілі, што Беларусь і Расія дэманструюць адзінства ў абароне гістарычнай памяці перад тварам тых выклікаў і пагроз, якія кінутыя нашым дзяржавам.

- Галоўныя ўрокі Вялікай Перамогі — гэта ўрокі згуртаванасці і яднання народаў у супрацьстаянні гвалту і прыгнёту. Няхай вялікая перамога ўмацоўвае нашу Айчыну, яе суверэнітэт і незалежнасць. Тут, у глыбокім тыле ворага прадстаўнікі брацкіх народаў Савецкага Саюза Кавалі перамогу. Яны мацавалі веру ўсіх прагрэсіўных людзей, што можна супрацьстаяць ворагу. Значнасць прарыву партызанамі вогненнага кальца велізарная не толькі ў гісторыі Вялікай Айчыннай вайны, але і ў палітычным сэнсе. Мы —нашчадкі Перамогі, мы павінны яшчэ мацней сябраваць для таго, каб ніколі не прыйшла вайна, – адзначыў Старшыня Смаленскай абласной думы Ігар Ляхаў.

Родныя народных мсціўцаў прыехалі на Ушаччыну, каб ушанаваць памяць сваіх дзядоў і прадзедаў.

Удзельнікі ўрачыстага мітынгу ўшанавалі памяць загінуўшых хвілінай маўчання, усклалі вянкі і кветкі.

dubrovno.by