07.04.2026

Больш за 200 літраў малака ў дзень атрымлівае адна з лепшых маладых работнікаў на МТФ "Чыжоўка" ў Дубровенскім раёне

Нюша, Рыжык, Моніка, Ранетка, Дзіна, Жучка і яшчэ 50 буронак знаходзяцца на апецы маладога аператара машыннага даення з ААТ "Якубава-Агра" Алы Таргоні. Даярка якасна і адказна спраўляецца са сваёй працай і вынікі не прымусілі сябе доўга чакаць. Яна адна з лепшых маладых работнікаў у раёне ў жывёлагадоўчай галіне.

Як ёй гэта ўдаецца, даведаліся, пабываўшы на МТФ "Чыжоўка".

Мы прыехалі на ферму пасля ранішняй дойкі, але жывёлаводы працягвалі працу: у іх абавязкі ўваходзіць чыстка і ўборка кароўнікаў, раздача канцэнтратаў, агляд і праверка саматыкі.

Ала Таргоня як раз рыхтавала падсцілачны матэрыял для сваіх каровак, калі мы з ёй сустрэліся. Жыццярадасная, пазітыўная і заўсёды ўсмешлівая - такой мы ўбачылі маладую жанчыну.

— Нарадзілася я непадалёк, у Копцях, у бацькоў нас было шасцёра. І ўсё з дзяцінства да працы на зямлі прывучаны: гаспадарку заўсёды трымалі. Так што мне даглядаць за жывёламі не ў навінку.

Вось я пасля вучобы і пайшла ў наша сельгаспрадпрыемства, бацькі тут працавалі і мы, дзеці, працягваем на малой радзіме працаваць. Выйшла замуж, трое дзяцей у нас з мужам, у Пірагах гаспадарка дом прадаставіла — вось і ўся мая біяграфія, — усміхаючыся, распавядае мая суразмоўніца.

На пытанне, як атрымоўваецца дамагацца высокіх надояў, адказвае, што складанага тут нічога няма, проста трэба любіць жывёл і клапаціцца пра іх.

— Летась я атрымала групу маладняку на раздой. Асаблівасці кожнай кароўкі вывучыла, кожнай імя дала. Вядома, праца аператара машыннага даення — справа няпростая, але цяпер працаваць на ферме гэта не раней, калі рукамі ўсіх кароў даілі.

Ды і ўмовы працы нашмат палепшыліся, акрамя аўтаматызацыі даення ў нас прасторныя пакоі адпачынку, прыёму ежы, цяпер ідзе рамонт санвузлоў — усё абсталяванне сучаснае, новае. Прыгажосць! — дзеліцца наша суразмоўніца.

Брыгадзір МТФ Ала Сардэчная адклікаецца аб сваёй працаўніцы толькі станоўча:

— Выдатны спецыяліст. Добрасумленная, адказная, на яе заўсёды спадзявацца можна. Паказчыкі ў яе высокія, больш за 200 л у дзень надойвае. За ўсімі кароўкі як за роднымі дзеткамі даглядае, за гэты месяц у яе групе 15 ацёлаў было.

Мы пабывалі і ў новым, пабудаваным восенню прафілакторыі для цялят. Тут нас сустрэў Аляксандр Дзярноў. На яго апецы 30 цялятак.

Мужчына за імі вельмі клапатліва даглядае. Ён падрабязна распавёў пра тое, колькі працы трэба ўкласці, каб нованароджанае цяля адужэла і набралося сіл. Спачатку 10 дзён Аляксандр іх поіць з соскi, накрывае саломай, каб не змерзлі.

Жывёлавод сочыць, каб у кожнага цяля ў паілцы была цёплая вада. Паступова ў рацыён дадаюцца вітамінныя канцэнтраты, грубыя кармы. У індывідуальных клетках цялят чыста, цёпла, светла і ўтульна. Пад апекай Аляксандра Дзярнова яны знаходзяцца да месяца, а потым пераводзяцца ў іншае памяшканне.

Малочна-таварная ферма "Чыжоўка" ААТ "Якубава-Агра" заўсёды адрозніваецца дагледжанымі жывёламі, дысцыплінаванымі работнікамі і парадкам.

Гэта заслуга ўсяго дружнага і згуртаванага калектыву. Тут усе працуюць на агульны вынік. А кіраўнік гаспадаркі ва ўсім падтрымлівае калектыў МТФ — і, мабыць, менавіта дзякуючы такой зладжанасці і адказнасці ўсё ўдаецца гэтаму сельгаспрадпрыемству.

На 1 красавіка валавы надой па гаспадарцы склаў 108,3% да ўзроўню мінулага года, надой на карову амаль 14 літраў.

dubrovno.by