04.12.2025

А ваша аўто пераабута: сумесны рэйд АДАІ Дубровенскага РАУС і карэспандэнта раённай газеты

1 верасня 2025 года былі адкарэктаваны правілы дарожнага руху. Адзін з пунктаў датычыўся выкарыстання зімовай гумы на легкавых аўтамабілях. Па новых правілах, падчас эксплуатацыі зімовыя шыны павінны мець рэшткавую глыбіню малюнка пратэктара не менш за 4 мм.

Зімовымі лічацца цяпер толькі шыны, на маркіроўцы якіх адначасова прысутнічаюць два знакi: знак горнай вяршыні з трыма пікамі і сняжынкай унутры, а таксама адзін са знакаў M+S, M&S, MS. Хоць снег яшчэ не выпаў, ноччу тэмпература дасягае мінусавых паказчыкаў, з-за чаго днём на дарогах можа быць слізка. Цяпер па 5 снежня 2025 года на тэрыторыі краіны Дзяржаўтаінспекцыя праводзіць Рэспубліканскую прафілактычную акцыю "Зіма – экзамен для вадзіцеля!". Карэспандэнты раённай газеты вырашылі падключыцца да рэйдавых мерапрыемстваў АДАІ Дубровенскага РАУС.

Па словах інспектараў, прычыны, чаму людзі выязджаюць на летніх шынах зімой, могуць быць розныя. Адны звычайна не ездзяць зімой, але некалькі разоў за сезон можа ўзнікнуць неабходнасць у паездцы. Іншыя проста цягнуць да апошняга і таму не паспяваюць замяніць шыны да 1 снежня.

- У апошнія гады зімы сталі мяккія, тэмпературы плюсавыя, снегу няма — вось некаторыя вадзіцелі і не спяшаюцца, бо, як ім здаецца, так яны берагуць шыны. Аднак неабходна не чакаць снегу і маразоў, а адпраўляцца на шынамантаж нават пры сярэднясутачнай тэмпературы 5°C. Звычайна такая тэмпература ўсталёўваецца ўжо ў пачатку лістапада. Так зрабіў асабіста я, - дзеліцца інспектар Дубровенскага АДАІ Аляксандр Андрэеў. - Калі ездзіць у такое надвор'е на зімовых шынах, на знос гэта моцна не ўплывае, затое зніжае рызыку трапіць у ДТЗ.

Па словах інспектараў, усе кіроўцы лічаць абгрунтаваным патрабаванне выкарыстоўваць якасную зімовую гуму ў халодную пару года, так як усе адчуваюць, наколькі жорсткай становяцца на холадзе летнія шыны і наколькі горш кіраваць аўтамабілем. Але некаторыя не выконваюць яго па розных прычынах. Хтосьці беражэ шыны на шкоду ўласнай бяспецы, іншыя не могуць вылучыць сродкі, трэція спадзяюцца на авось, што за кароткую паездку нічога дрэннага не адбудзецца.

За 20 хвілін работы інспектарамі спынена больш за 10 аўтамабіляў, і з шынамі ва ўсіх парадак. У цэлым нашы суразмоўцы адзначылі, што за змену яны правяраюць да сотні аўтамабіляў.

- Як паказвае практыка, кіроўцы сталі больш адказнымі. Усё радзей можна сустрэць аўтамабіль з летняй гумай зімой. За ўдзел у дарожным руху на летніх або зношаных шынах зімой прадугледжана адказнасць. Гаворка ідзе пра папярэджанне або штраф да 1 базавай велічыні, а пры паўторным на працягу года парушэнні - ад 2 да 5 базавых велічынь, - тлумачыць Аляксандр Андрэеў. - Калі ж зношаная ці ж летняя гума прывядзе да стварэння аварыйнай абстаноўкі або ДТЗ, то штраф прадугледжаны значна вышэй з магчымым пазбаўленнем кіроўцы правоў.

Акрамя таго, інспектары нагадалі: важная не толькі змена шын, але і абдуманая манера кіравання і паводзін на дарозе:

- Варта пазбягаць рэзкіх манеўраў і рухаў, асабліва паблізу пешаходных пераходаў, на закругленнях і ўчастках дарогі. Трэба выбіраць бяспечную хуткасць, якая адпавядае дарожным і пагодным умовам. Кіроўцам варта павялічваць дыстанцыю пры руху, правяраць, каб усе пасажыры былі прышпіленыя. Пешаходам таксама варта быць асцярожнымі. Захоўваць асцярожнасць пры пераходзе дарогі і выкарыстоўваць святлоадбівальныя элементы, каб быць прыкметнымі ў цемры.

dubrovno.by