03.09.2025

2 верасня на Дубровеншчыне прайшлі мерапрыемствы, прысвечаныя дню нараджэння Героя Савецкага Саюза Юрыя Васільевіча Смірнова

Ю.В. Смірноў нарадзіўся ў 1925 г. у вёсцы Дзетукова Кастрамской вобласці.

Калі пачалася вайна, Юрыю не было і 16 гадоў. Бацька пайшоў на фронт, а праз некаторы час Юрый быў накіраваны на працу ў г. Горкі, дзе атрымаў цяжкую вестку аб гібелі бацькі. Васіль Смірноў загінуў, абараняючы Сталінград. Некалькі разоў Юрый Смірноў спрабаваў сысці на фронт добраахвотнікам, але яго не бралі з-за ўзросту.

Толькі ў сакавіку 1943 г. яго прызываюць у войска і залічваюць курсантам у навучальны полк. Пасля праходжання шасцімесячнай баявой падрыхтоўкі Юрый атрымаў званне малодшага сяржанта і быў накіраваны ў 46-ы гвардзейскі стралковы полк 16-й гвардзейскай Карачоўскай стралковай дывізіі. Баявое хрышчэнне атрымаў пад Віцебскам, дзе ў баі быў цяжка паранены. Пасля выздараўлення ваяваў у 77-м гвардзейскім стралковым палку 26-й гвардзейскай Гарадоцкай стралковай дывізіі. Частка рыхтавалася да аперацыі "Баграціён".

25 чэрвеня 1944 г. быў сфармаваны танкавы дэсант з добраахвотнікаў, у ліку якіх быў і Юрый Смірноў. Перад імі ставілася задача: прабіцца ў тыл да фашыстаў і паралізаваць абарону ў раёне прарыву.

Малады воін быў паранены і трапіў у палон да гітлераўцаў, якія падвергнулі яго самым жорсткім катаванням. Яму было 18 гадоў. Верны прысязе, Юрый Смірноў не выдаў ваеннай тайны. Яго ўкрыжавалі на крыжы з дошак, прыбітых да сцяны бліндажа, убіўшы цвікі ў рукі, ногі і галаву.

Ва ўзнагародным лісце аб пасмяротным прысваенні гвардыі малодшаму сяржанту Юрыю Смірнову звання Героя Савецкага Саюза гаворыцца: "сваёй устойлівасцю і мужнасцю Смірноў садзейнічаў поспеху бітвы, здзейсніўшы тым самым адзін з найвышэйшых подзвігаў салдацкай доблесці...".

У ДУА "Сярэдняя школа №2 г. Дуброўна імя Ю. Смірнова" ў гэты дзень адбыліся ўрачыстыя лінейкі памяці, прысвечаныя 100-годдзю з дня яго нараджэння.

Памяць Героя ў дзень яго нараджэння ўшанавалі падчас мітынгу ў аг. Буда, дзе знаходзіцца сельскагаспадарчае прадпрыемства, названае яго імем. Старшыня Пірагоўскага сельсавета Сяргей Уладзімірэнка, жыхары аграгарадка, школьнікі і члены раённага аддзялення Беларускай партыі "Белая Русь" успомнілі пра гераічны подзвіг савецкага салдата і ўсклалі кветкі да помніка.

Старшыня Савета ветэранаў Вера Чаплева звярнулася да навучэнцаў:

- У нашай памяці ён застанецца вечна юным. Яго сіла духу і любові да Радзімы няхай будзе прыкладам вам, маладому пакаленню.

dubrovno.by