20.11.2019

У Віцебску ўдзельнікам «100 ідэй для Беларусі» раскажуць, як прасоўваць свае праекты

 

У Віцебскім дзяржаўным тэхналагічным універсітэце (ВДТУ) сёння пройдзе абласны адукацыйны семінар для ўдзельнікаў занальных этапаў рэспубліканскага маладзёжнага праекта БРСМ "100 ідэй для Беларусі", паведамілі БЕЛТА ў абласным камітэце БРСМ.

Адукацыйны семінар адбудзецца на базе навукова-тэхнічнага парку ВДТУ. Сваім вопытам будуць дзяліцца двойчы пераможца рэспубліканскага этапу праекта "100 ідэй для Беларусі" Дзмітрый Варахобка, дырэктар гарадскога партала Андрэй Лапін і пераможца рэспубліканскага этапу праекта ў 2019 годзе Уладзіслаў Бука. Спікеры дапамогуць павысіць узровень навыкаў прасоўвання і прэзентацыі праектаў удзельнікаў.

Эстафета занальных этапаў рэспубліканскага інавацыйнага праекта "100 ідэй для Беларусі" стартавала ў кастрычніку і ўжо падыходзіць да завяршэння: на чарзе горад Віцебск, дзе наватары сустрэнуцца 28 лістапада. Занальныя этапы праекта прайшлі ў Наваполацку, Глыбокім і Дуброўна, дзе эксперты ўжо разгледзелі больш за 35 праектаў, накіраваных на розныя сферы жыццядзейнасці. Паўфінал праекта адбудзецца ў Віцебску ў снежні.

"100 ідэй для Беларусі" - рэспубліканскі маладзёжны праект "БРСМ", асноўная задача якога заключаецца ў актывізацыі інавацыйнай дзейнасці і прафесійнай мабільнасці моладзі, стварэнні і прасоўванні канкрэтных інавацыйных праектаў і перспектыўных навукова-тэхнічных распрацовак.