10.12.2019

У Віцебску адкрылася выстава савецкіх навагодніх цацак

 

Выстава савецкіх цацак "20.20. З Новым годам" адкрылася ў Віцебскім Музеі гісторыі прыватнага калекцыянавання.

Для навагодніх цудаў не існуе межаў і забаронаў. У гэты чароўны час магчыма ўсё, напрыклад, вяртанне ў дзяцінства. А для таго, каб гэта на першы погляд нерэальнае жаданне споўнілася, дастаткова толькі зазірнуць на выставу ў Музей гісторыі прыватнага калекцыянавання. Менавіта там, у асяроддзі савецкіх навагодніх цацак і лялек, кожны, нават самы скептычна наладжаны дарослы, адчуе сябе дзіцем, якое чакае чараўніцтва.

Шкляныя медзведзяняты і зайчаняты з прыватнай калекцыі Алега і Алены Карпіцкіх нагадаюць пра тое, што ў кожным з нас працягвае жыць маленькае дзіця, у таямніцы ад усіх якое марыць аб малюсенькім цудзе і кропельцы цяпла ў марозны снежаньскі дзень.

"Экспанаты нашай калекцыі - нешта большае, чым проста цацкі. Бо ў кожнага з іх свая гісторыя, энергетыка, лёс", - адзначае Алег Карпіцкі.

Самыя маленькія госці казачнай экспазіцыі будуць несумненна рады ўбачыць напярэдадні святаў доўгачаканых Дзеда Мароза і Снягурку ў кампаніі плюшавых жыхароў зімовага лесу.

«У нашай калекцыі сабраны як цацкі масавай вытворчасці, так і унікальныя ўзоры ручной працы, – кажа Алена Карпіцкая. - Час у якім мы жывем накладвае адбітак і на цацкі. Экспанаты выставы дэманструюць, якімі бачыліся вобразы казачных персанажаў людзям савецкай эпохі, бо ўсе цацкі, прадстаўленыя на выставе, вырабляліся на тэрыторыі СССР. Нам вельмі прыемна выступаць у нейкай ступені захавальнікамі традыцый і паказваць сучасным дзецям часцінку свету, у якім жылі іх бацькі, калі былі маленькімі".

Паглядзець на цацкі эпохі СССР і пранікнуцца атмасферай свята з прысмакам настальгіі можна будзе да 13 студзеня. Кошт квіткоў таксама ў савецкім стылі - усяго 2.50 рублi, для школьнікаў і студэнтаў – 2 рублі.