04.03.2026

Рашэнне ВДС: хутка пачнуць дзейнічаць прамыя чыгуначныя зносіны паміж Смаленскам, Оршай і Віцебскам

Рашэнне аб прыгарадных чыгуначных зносінах паміж Оршай і Віцебскам і Смаленскам прынята Вышэйшым дзяржаўным саветам Саюзнай дзяржавы. Па выніках пасяджэння ў Маскве падпісаны адпаведны дэкрэт ВДС, перадае карэспандэнт БЕЛТА.

Дзяржаўны сакратар Саюзнай дзяржавы Сяргей Глазьеў па выніках пасяджэння падзяліўся з журналістамі некаторымі падрабязнасцямі: "Паводле даных нашых міністэрстваў транспарту, якія дакладвалі па гэтым пытанні, арганізацыя гэтых чыгуначных зносін пачнецца ўжо ў бліжэйшы час. Мы спадзяёмся, што Дзень яднання, які мы адзначаем у пачатку красавіка, ужо будзе адзначаны магчымасцю для жыхароў прыгранічных абласцей - Смаленскай і Віцебскай - скарыстацца гэтай паслугай".

Пры гэтым будуць захаваны ўсе льготы, якія ёсць цяпер на пасажырскім чыгуначным транспарце, для ўсіх катэгорый грамадзян. "Тарыфы будуць даступнымі, перамяшчацца будзе камфортна. Гэта будуць электрапаязды высокай камфортнасці. І хутчэй, і танней, чым іншымі відамі транспарту, уключаючы аўтамабільны. Як было сказана сёння, па кожным маршруце штодзённа будуць курсіраваць тры пары паяздоў", - расказаў дзяржсакратар.

"Калі гэты пілотны праект атрымае запатрабаванасць, мы будзем пашыраць зносіны з іншымі абласцямі Беларусі, што мяжуюць, і суб'ектамі Расійскай Федэрацыі", - дадаў Сяргей Глазьеў.

БелТА