24.05.2019

Пазнаёміцца з цацачнымі гісторыямі запрашае выстава ў Віцебску

 

У Віцебску сёння адкрываецца выстава "Цацачныя гісторыі", паведамілі карэспандэнту БЕЛТА ва ўстанове культуры.

Акунуцца ў чароўны свет дзяцінства можна ў культурна-гістарычным комплексе "Залатое кальцо горада Віцебска "Дзвіна". На цэлы месяц яго выставачная зала ператворыцца ў своеасаблівую казачную прастору, у якой самыя любімыя ўсімі дзецьмі прадметы - цацкі - паўсталі ва ўсім багацці творчай фантазіі: вязаныя і пашытыя, саламяныя і керамічныя, з тканіны і воўны, гульнявыя і абрадавыя, утылітарныя і інтэр'ерныя. Знаёмства з імі стане цікавым як для дзяцей, так і для дарослых, упэўнены спецыялісты.

Экспазіцыя падрыхтавана юнымі членамі аб'яднання па інтарэсах гарадскога Цэнтра дадатковай адукацыі дзяцей і моладзі, майстэрні "СуТворчасці", студыі выяўленчага мастацтва "ART-lab", Цэнтра развіцця дзяцей "Юла", а таксама дарослымі прафесіяналамі-лялечнікамі і аматарамі з Віцебска, Мінска, Магілёва, майстрамі Дамоў рамёстваў з Дуброўна, Оршы і Гарадка. Наведаць выставу можна па 3 ліпеня.