03.12.2019

Новы рэзідэнт СЭЗ «Віцебск» арганізуе ў Оршы збор і перапрацоўку будаўнічых адходаў

 

Рэзідэнтам СЭЗ "Віцебск" зарэгістравана прыватнае будаўнічае ўнітарнае прадпрыемства "Лінія зносу", якое арганізуе збор і перапрацоўку другасных матэрыяльных рэсурсаў, паведамілі карэспандэнту БЕЛТА ў адміністрацыі СЭЗ.

Прадпрыемства створана з удзелам беларускіх інвестараў і размесціцца на адной з пляцовак СЭЗ у Оршы. Яно будзе рэалізоўваць праект па ўтылізацыі бетону, будаўнічага смецця, драўняных адходаў, адходаў руберойда і бітуму, якія ўтвараюцца пры разборцы збудаванняў, а таксама іншых другасных матэрыяльных рэсурсаў. Пасля прадукты перапрацоўкі могуць выкарыстоўвацца ў дарожным будаўніцтве, вытворчасці дахавых матэрыялаў, ландшафтным дызайне, на жывёлагадоўчых фермах і птушкафабрыках.

Рэалізацыя інвестпраекта будзе спрыяць выкананню Праграмы сацыяльна-эканамічнага развіцця Аршанскага раёна да 2023 года, зацверджанай Указам №506, адзначылі ў адміністрацыі СЭЗ.

СЭЗ "Віцебск" утворана ў 1999 годзе і складаецца з 16 сектараў агульнай плошчай амаль 2,8 тыс. га, з якіх сем разьмешчаны ў Віцебску, пяць у Аршанскім, а таксама па адным у Віцебскім, Полацкім, Пастаўскім раёнах і Наваполацку. Рэзідэнтамі СЭЗ зарэгістраваны 49 прадпрыемстваў з удзелам інвестараў з 14 краін, у тым ліку Германіі, Чэхіі, Расіі, Польшчы, Вялікабрытаніі, ЗША, Ізраіля, Кіпра, Эстоніі, Літвы.