Ганаровае консульства Украіны сёння ўрачыста адкрылі па вуліцы Суворава ў Віцебску, перадае карэспандэнт БЕЛТА.

Пасол Украіны ў Беларусі Ігар Кізім адзначыў, што адкрыццё консульства будзе спрыяць развіццю адносін раёнаў Віцебскай вобласці з украінскімі рэгіёнамі. Адзін з прыярытэтных напрамкаў супрацоўніцтва - эканамічная сфера.

"Праца над адкрыццём консульства ў Віцебску вялася каля 1,5 гадоў - з маёй першай паездкі ў горад. Я тады зразумеў, што нам не хапае ўкраінскай прысутнасці ў паўночным рэгіёне Беларусі. Адкрыццё консульства будзе спрыяць пазнаванню Віцебскай вобласці ва ўкраінскіх рэгіёнах, - адзначыў дыпламат. - Сёння сустракаўся з кіраўніцтвам Віцебшчыны, мы пераглядаем усю дамоўную базу вобласці з нашымі рэгіёнамі. Падчас нядаўняга форуму ў Жытоміры былі рэанімаваны тры пагадненні з Адэскай, Чаркаскай і Вінніцкай абласцямі, якія былі падпісаныя яшчэ ў пачатку 1990-х гадоў".

Ігар Кізім дадаў, што ва Украіне ідзе дэцэнтралізацыя, адкрываюцца новыя магчымасці для рэгіёнаў. "Ускладаю вялікія надзеі на ганаровага консула Ігара Калінічэнку. Ён бізнэсовец, галоўнай у ягонай працы будзе дапамога ў наладжванні эканамічных стасункаў, каб украінскім прадпрымальнікам было лягчэй ствараць сваю справу на Віцебшчыне. Чакаем, што і віцебскі бізнэс пойдзе ў Украіну", - сказаў пасол.

Дыпламат выказаў надзею, што будзе актывізавана праца грамадства украінцаў у Віцебску. Таксама консульства будзе дапамагаць у вырашэнні пытанняў грамадзян Украіны падчас знаходжання ў Беларусі, абароне іх правоў.

Памочнік Прэзідэнта - інспектар па Віцебскай вобласці Анатоль Ліневіч пажадаў, каб сувязі беларускага рэгіёна з украінскімі перараслі ў сяброўскія адносіны іх кіраўнікоў, што дасць новы імпульс двухбаковаму супрацоўніцтву. "У Віцебску сёння досыць цёплае для снежня надвор'е. Упэўнены, што і адносіны паміж нашымі краінамі будуць такімі ж. Мы можам мець зносіны на родных мовах і разумець адзін аднаго, усё гэта змацоўвае ўзаемадзеянне ў эканоміцы, сацыяльнай сферы", - сказаў ён.

Першы намеснік старшыні аблвыканкама Алег Мацкевіч падкрэсліў, што пасля адкрыцця консульстваў замежных краін у Віцебску (напрыклад, Латвіі) праца выходзіць на новы ўзровень. "Яна актывізуецца па любых напрамках - эканамічным, культурным, гуманітарным. Думаю, што і ўкраінскае прадстаўніцтва ў нашым горадзе будзе гэтаму спрыяць", - адзначыў ён.

За студзень-кастрычнік тавараабарот Віцебскай вобласці з Украінай склаў $264,2 млн, у тым ліку экспарт - $196,9 млн. Істотна павялічыўся аб'ём паставак у Сумскую (рост у 9 разоў), Адэскую (у 4,5) і Львоўскую (у 2) вобласці. Найбольшая доля ў тавараабароце з Украінай належыць Кіеву, Жытомірскай, Адэскай і Днепрапятроўскай абласцях.