24.12.2019

Больш за 40 крыніц Віцебскай вобласці з'явіліся на публічнай кадастравай карце

 

Прасторавы пласт "Крыніцы" публічнай кадастравай карты Беларусі папоўніўся інфармацыяй пра яшчэ 41 такі аб'ект на тэрыторыі Віцебскай вобласці, паведамілі БЕЛТА ў Дзяржаўным камітэце маёмасці.

На карце можна ўбачыць месцазнаходжанне крыніцы, яе кароткае апісанне і інфармацыю аб стане воднай крыніцы. Зборам гэтай інфармацыі займаліся спецыялісты Віцебскага агенцтва па дзяржаўнай рэгістрацыі і зямельным кадастры, а таксама прадстаўнікі мясцовых выканаўчых камітэтаў і жыхары.

Па дадзеных Нацыянальнага кадастравага агенцтва Дзяржкаммаёмасці, усяго на публічнай кадастравай карце зараз пазначана 678 крыніц, з якіх 165 знаходзяцца на тэрыторыі Гомельскай вобласці, 159 - Магілёўскай, 144 - Мінскай, 70 - Гродзенскай, па 69 - у Віцебскай і Брэсцкай абласцях. Таксама на карце ёсць інфармацыя аб двух крыніцах Мінска.