26.12.2019

Абласная прафсаюзная ёлка ў Віцебску: інтэрактыў і мноства сюрпрызаў

 

У Віцебску сёння пройдзе абласное прафсаюзнае свята для дзяцей, паведамілі карэспандэнту БЕЛТА ў абласным прафсаюзным аб'яднанні.

Галоўная прафсаюзная дабрачынная ёлка адбудзецца ў Віцебскім абласным Палацы дзяцей і моладзі. На ранішнік былі запрошаны больш за 250 хлопцаў і дзяўчат. Гэта дзеці-сіроты, выхаванцы дзіцячых дамоў, дзеці, якія засталіся без апекі бацькоў і з абмежаванымі магчымасцямі, а таксама выхоўваюцца ў шматдзетных і малазабяспечаных сем'ях. Свята будзе поўна навагодніх сюрпрызаў, гульняў і падарункаў. Навагодняе прадстаўленне, падрыхтаванае вядучымі дзіцячымі калектывамі палаца, пройдзе ў займальным інтэрактыўным узаемадзеянні казачных персанажаў з юнымі гледачамі.

Навагоднія святы - толькі частка вялікай дабрачыннай акцыі "Прафсаюзы-дзецям". Па традыцыі напярэдадні навагодніх і калядных святаў прафсаюзы актыўна ўдзельнічаюць у дабрачынных мерапрыемствах, накіраваных на ўразлівыя катэгорыі непаўналетніх. Прадстаўнікі прафсаюзных арганізацый усіх узроўняў ва ўсіх рэгіёнах краіны наведваюць дзіцячыя дамы, школы-інтэрнаты, дамы-інтэрнаты для дзяцей-інвалідаў, сацыяльныя прытулкі, дамы дзіцяці, сустракаюцца з выхаванцамі падшэфных інтэрнацкіх устаноў. "Для нас гэта вельмі важны пласт працы, накіраваны перш за ўсё на тое, каб самае галоўнае зімовае свята апраўдала чаканні кожнага дзіцяці", - падкрэслілі ў прафсаюзнай арганізацыі.

У Віцебскай вобласьці з моманту абвяшчэньня ў 2002 годзе дабрачыннай акцыі "Прафсаюзы-дзецям" на абласной прафсаюзнай ёлцы ўжо пабывалі каля 4,5 тыс. дзяцей.

Арганізатары навагодняга мерапрыемства - Віцебскае абласное аб'яднанне прафсаюзаў, галіновыя прафсаюзы, першасныя прафсаюзныя арганізацыі прадпрыемстваў і арганізацый горада.