У Віцебску з'явіўся новы арт-аб'ект
У парку 1000-годдзя Віцебска работнікі Віцебскага гарадскога аддзела па надзвычайных сітуацыях устанавілі новы арт-аб'ект – лаўку «101», паведамляе прэс-служба абласнога ўпраўлення МНС. Гэта работа выканана ў рамках рэспубліканскага суботніка і добраўпарадкавання горада да XI Форуму рэгіёнаў Беларусі і Расіі.
Каманда ратавальнікаў, узброіўшыся неабходнай прыладай, з самай раніцы пачала падрыхтоўчыя працы, а да абеду новы аб'ект ужо прыцягваў увагу гараджан. Два з паловай метры ў вышыню і тры - у даўжыню. Нумар выкліку службы выратавання зараз бачны здалёк.
- Толькі за мінулы год 1804 разы была аказана дапамога насельніцтву, арганізацыям нашага горада ў ліквідацыі пажараў і іншых здарэнняў дзякуючы званку на гэты нумар, - распавядае намеснік начальніка аддзела Сяргей Лавейкін. - Цяпер лаўка размешчана ў непасрэднай блізкасці да самай вялікай дзіцячай пляцоўкі горада. Прайшоўшы міма, дзіця сапраўды пацікавіцца ў бацькоў, што гэта за лічбы. З гэтага моманту і пачнецца вывучэнне правіл бяспекі.
