У Беларусі да канца года ўвядуць тры пелетныя вытворчасці

У Беларусі да канца года будуць уведзены ў эксплуатацыю тры пелетныя вытворчасці. Аб гэтым паведаміў сёння журналістам на прэс-канферэнцыі першы намеснік міністра лясной гаспадаркі Валянцін Шатраўка, перадае карэспандэнт БЕЛТА.

"Нашы цэхі займаюцца не толькі вытворчасцю піламатэрыялаў, але апошнім часам мы актыўна развіваем такія напрамкі, як сушка пілапрадукцыі, а таксама вытворчасць пелет. У мінулым годзе былі ўведзены ў строй сем пелетных вытворчасцей, у гэтым годзе - ужо тры, да канца года будзе ўведзена яшчэ тры. Гэтыя вытворчасці даюць магчымасць выкарыстоўваць тую драўніну, якая не знаходзіла збыту ў мінулыя гады, і сёння мы можам уключыць яе ў эканамічную дзейнасць", - адзначыў першы намеснік міністра.

Паводле яго інфармацыі, на сённяшні дзень усе сем пелетных вытворчасцей, якія былі запушчаны ў мінулым годзе, працуюць на поўную моц. "Збыт прадукцыі забяспечаны. Адзінае, у міжсезонне, у якім мы цяпер знаходзімся, цэны, вядома, не зусім высокія, але нават яны даюць магчымасць працаваць з прыбыткам. Калі гаварыць аб далейшым развіцці пелетных вытворчасцей, то ў Міністэрстве лясной гаспадаркі зацверджана адпаведная праграма, і мы дакладна прытрымліваемся гэтай праграмы, і нічога, прынамсі на сённяшні дзень, не перашкаджае або не стварае якіх-небудзь цяжкасцей у тым, каб гэтыя пелетныя вытворчасці развіваліся", - дадаў Валянцін Шатраўка.

Таксама першы намеснік міністра адзначыў: немалаважным фактарам з'яўляецца тое, што пелетная вытворчасць развіваецца на базе лесапільных прадпрыемстваў, каб таксама ў большай ступені выкарыстоўваць тыя адходы, якія ўтвараюцца ў цэхах. "Калі раней мы гэтыя апілкі вывозілі на палігоны і не ведалі, што з імі рабіць, або пастаўлялі ў сельгасарганізацыі, то цяпер развіццё пелетных вытворчасцей дае нам магчымасць атрымліваць дадатковую прадукцыю з тых адходаў, якія ў нас ёсць на вытворчасцях", - дадаў ён.

БелТА

Усе навіны