Мінтранс: пагадненне аб міжнародных аўтаперавозках з Кітаем можа пачаць працаваць у пачатку 2020 года
Пагадненне аб міжнародных аўтамабільных перавозках паміж Беларуссю і Кітаем можа пачаць працаваць у пачатку 2020 года. Аб гэтым паведаміў сёння на прэс-канферэнцыі начальнік упраўлення аўтамабільнага і гарадскога пасажырскага транспарту Мінтранса Сяргей Дубіна, перадае карэспандэнт БЕЛТА.
Прадстаўнік ведамства адзначыў, што ў бягучым годзе было падпісана тры міжнародныя пагадненні ў галіне аўтамабільнага транспарту: пратакол аб унясенні змяненняў у пагадненне з Малдовай, што прадугледжвае ўвядзенне бездазвольнай сістэмы, а таксама пагадненні з Кітаем і Вялікабрытаніяй у галіне міжнародных транспартных зносін.
"Што датычыцца Кітая, то з нашага боку ўсе працэдуры ўжо завершаны. З кітайскага (паводле інфармацыі адпаведных ведамстваў) яны таксама або ўжо завершаны, або знаходзяцца ў завяршальнай стадыі, - адзначыў Сяргей Дубіна. - Па ўмовах пагаднення яно ўступае ў сілу праз 30 дзён пасля атрымання апошняга пiсьмовага паведамлення аб завяршэнні адпаведных працэдур. Мы чакаем, што гэта будзе або канец бягучага, або пачатак наступнага года".
У любым выпадку, першыя перавозкі, паводле слоў прадстаўніка Мінтранса, пачнуць ажыццяўляцца ў 2020 годзе.
"Раней Кітай зыходзіў з меркавання, што перавозкі могуць ісці толькі ў рамках прыгранічнай зоны - 60 км да бліжэйшага транспартна-лагістычнага цэнтра. Гэта датычылася і замежных перавозчыкаў, якія заязджалі ў Кітай, і кітайскіх перавозчыкаў, якія выязджалі з краіны. Мы сталі трэцяй дзяржавай, з якой Кітай падпісаў дакумент, што распаўсюджваецца на ўсе віды перавозак, у тым ліку транзітныя. Гэта значыць наша пагадненне дазваляе ажыццяўляць перавозкі не ў прыгранічнай зоне, а на тэрыторыі ўсяго Кітая", - адзначыў Сяргей Дубіна.
Міжнародныя аўтаперавозчыкі займаюць у Беларусі не апошняе месца па паступленні валютнай выручкі. За студзень-верасень экспарт паслуг аўтамабільнага транспарту склаў 104,8 працэнта да аналагічнага перыяду мінулага года (больш за $1 млрд).