Рэспубліканскі "Апошні званок" у будучым хочуць праводзіць у маладзёжных сталіцах Беларусі
Рэспубліканскае свята "Апошні званок" у будучым хочуць праводзіць у маладзёжных сталіцах Беларусі, зрабіўшы гэта традыцыяй. Аб гэтым заявіў журналістам перад адкрыццём свята для выпускнікоў у Оршы міністр адукацыі Ігар Карпенка, перадае карэспандэнт БЕЛТА.
Міністр расказаў, што ў гэтым годзе з беларускіх школ выйдуць каля 56 тыс. выпускнікоў. Яны здадуць выпускныя экзамены, а затым іх чакае ЦТ і ўступная кампанія. "Выпускнікі, якія выходзяць у самастойнае жыццё, - наша будучае. Хочацца пажадаць моладзі поспехаў, а калі іх шлях будзе ўскладняцца нейкімі праблемамі, каб яны былі пераадольныя. Галоўнае, каб юнакі і дзяўчаты ішлі да намечанай мэты, свае веды, вопыт, асобасныя якасці аддавалі на карысць народа і краіны", - адзначыў Ігар Карпенка.
Ён паведаміў, што ёсць планы закласці новую традыцыю ў правядзенні рэспубліканскага "Апошняга званка". "У мінулым годзе ён прайшоў у Мінску, свята тады ўдалося, хлопцы і дзяўчаты падыходзілі і дзякавалі за яго. Сёння "Апошні званок" праходзіць у Оршы, маладзёжнай сталіцы, куды з'ехаліся навучэнцы з усёй краіны. Ёсць ідэя ў будучым яго праводзіць у рэгіёнах, у маладзёжнай сталіцы Беларусі, каб у далейшым гэта стала традыцыяй", - сказаў міністр.
Ігар Карпенка таксама акцэнтаваў увагу на ролі педагога ў адукацыі і выхаванні школьнікаў. "У нас шмат таленавітых і цікавых настаўнікаў. Ролю іх цяжка пераацаніць, без педагога многія рэчы не рэалізуюцца ў школе. Перакананы, што ніякі камп'ютар, робат не заменіць прамых стасункаў, бо педагог цікавы і як асоба", - падкрэсліў міністр.
Асноўныя ўрачыстасці "Апошняга званка" прайшлі ў Лядовай арэне Оршы. У свяце прымалі ўдзел каля 1,7 тыс. выпускнікоў 11-х класаў з усёй Беларусі. Больш за ўсё, вядома ж, навучэнцаў са школ Аршанскага раёна. Сярод іх - Аляксандр Хрысценка з гімназіі горада Барань і Ганна Кузьменка з Оршы. Абодва выпускнікі гавораць, што будуць сумаваць па сябрах і настаўніках, якія шмат уклалі ў іх. Але хвалявання перад экзаменамі няма - рыхтаваліся да іх адказна.
"Хачу паступіць у БДУ, адвучыцца і стаць спецыялістам у сферы прыкладной матэматыкі і інфарматыкі. Пакуль планую пасля заканчэння ВНУ застацца ў аспірантуры і сумяшчаць вучобу і работу ў ІТ-кампаніі. Для сябе паставіў мэту развівацца па жыцці, знайсці такую работу, дзе можна будзе пастаянна расці, пра нешта новае даведвацца, таму выбраў матэматыку, IТ-сферу. У ёй, каб заставацца запатрабаваным, ты павінен развівацца", - падзяліўся планамі выпускнік.
Ён падкрэсліў, што мае намер прыносіць карысць сваёй краіне. "Хачу стаць прафесіяналам і быць карысным Беларусі. Калі стану педагогам, то буду дапамагаць краіне, навучаючы іншых. У выпадку выбару IT-сферы, то распрацоўкай праграмнага забеспячэння, у тым ліку для нашай эканомікі", - рэзюмаваў Аляксандр Хрысценка.
Ганна Кузьменка збіраецца стаць медыкам. Пасля ЦТ будзе глядзець па балах, куды праходзіць - на лячэбны або стаматалагічны факультэты БДМУ. "Спадзяюся, што ўсё атрымаецца, хочацца ў будучым сваёй работай дапамагаць людзям. Пасля заканчэння ўніверсітэта мару адкрыць свой медыцынскі цэнтр. Таксама не збіраюся кідаць творчую дзейнасць, буду развівацца ў вакальным напрамку", - гаворыць выпускніца.
Орша 30 мая ператварылася ў горад моладзі. Навучэнцы з розных бакоў горада ішлі да Лядовай арэне, бадзёра напяваючы песні Цімы Беларускіх, Макса Каржа, Басты і іншых сваіх любімцаў. У натоўпе будучых абітурыентаў была Паліна Кракасевіч з Мінска. Дзяўчына рада, што прыехала на рэспубліканскі званок, ёсць магчымасць паглядзець Оршу. "Свята цікавае, столькі равеснікаў з усёй краіны сабралася, - кажа Паліна. - У будучым хачу стаць стаматолагам. У школе падабаліся і добра даваліся хімія і біялогія. Паўплывала на выбар прафесіі і тое, што мой тата ўрач".
У час рэспубліканскага "Апошняга званка" некалькі выпускнікоў атрымалі ўзнагароды ў намінацыях "Інтэлект", "Талент", "Чэмпіён-2019" і "Лідар-2019". Гэта пераможцы міжнародных і рэспубліканскіх алімпіяд, конкурсаў, спартыўных спаборніцтваў, турніраў. Падзякамі міністра адукацыі адзначаны і сем лепшых класных кіраўнікоў - па адным ад кожнай вобласці і Мінска.
Пасля ўзнагароджання ў Лядовай арэне стартавала канцэртная праграма. Моладзь забаўлялі Іван Вабішчэвіч, групы NaviBand, "Без Білета". Хэдлайнерам стаў Аляксей Вараб'ёў. Затым адбылася дыскатэка і святочны феерверк.
Праграма прадугледжвае, што дэлегацыі вобласці і Мінска правядуць у Оршы два дні. На 31 мая для выпускнікоў запланавана аглядная экскурсія па горадзе і ўрачыстая цырымонія ўскладання кветак на Аршанскім кургане.
