Выхаванцы Дубровенскай ЅТЭАМ-акадэміі сталі прызёрамі «Engineering Hexagon»
Выхаванцы STEАM-акадэміі сярэдняй школы №2 г.Дуброўна сталі прызёрамі трэцяга інжынернага мнагабор'я для школьнікаў 11-15 гадоў «Engineering Hexagon», арганізаванага EPAM Systems. Удзел у конкурсе стаў не проста першым мерапрыемствам у новым годзе, але і першым сумесным праектам з сябрамі і аднадумцамі - STEM-цэнтрам сярэдняй школы № 17 г. Орша.
-Мы аб'ядналіся ў каманду «Перазагрузка», назву якой далі невыпадкова: было вырашана, што ўдзел у «Engineering Hexagon» стане свайго роду перазагрузкай, як для вучняў, так і для нас, педагогаў, у крэатыўным мысленні, імкненні развівацца і ўдасканальвацца, - патлумачыла настаўнік інфарматыкі сярэдняй школы №2 г.Дуброўна Вікторыя Карнеева.
Вынік каманды «Перазагрузка» не прымусіў сябе доўга чакаць - на мнагабор'і школьнікі ўзялі чацвёртае месца. Вікторыя Карнеева адзначыла, што падобныя мерапрыемствы выконваюць сваю галоўную функцыю: спрыяюць фармаванню ўмення працаваць у камандзе.
-Навучэнцы школ з Дуброўна і Оршы працавалі выразна і зладжана, нават нягледзячы на тое, што пазнаёміліся адзін з адным у 7.00 гэтага ж дня, - сказала педагог. - Ад трэцяга прызавога месца нас аддзяляў адзін бал, што таксама стане выдатным стымулам для вучняў і далей вучыцца, паглыбляць свае веды.
Юлія СТАРАВОЙТАВА.
