У Дубровенскім СПЦ прайшоў дабрачынны ранішнік
Кожная добрая справа кагосці робіць шчаслівым, запальвае агеньчык надзеі і веры ў сэрцах людзей. Навагодняя дабрачынная акцыя «Нашы дзеці» з кожным годам набірае абароты, да яе далучаецца ўсё больш неабыякавых землякоў.
Марафон добрых спраў і яркіх эмоцый праходзіць пад патранатам Прэзідэнта Беларусі. Кульмінацыяй акцыі стала галоўная ёлка краіны з удзелам кіраўніка дзяржавы. У гэтым годзе з'явіліся новыя формы правядзення акцыі: тэлемарафон, эстафета добрых спраў, якая прайшла ў рэгіёнах. Упершыню былі арганізаваны балі для таленавітай і адоранай моладзі ў галінах, прайшоў Венскі баль у Палацы Незалежнасці ў Мінску.
У гэтыя дні кіраўнікі рэспубліканскіх органаў дзяржкіравання, мясцовых выканаўчых і распарадчых органаў наведалі дзіцячыя інтэрнаты і дамы сямейнага тыпу, апякунскія і прыёмныя сем'і, сем'і, якія выхоўваюць дзяцей-інвалідаў, цэнтры карэкцыйна-развіваючага навучання і рэабілітацыі, бальніцы. Яны павіншавалі дзяцей з Новым годам, Калядамі і ўручылі ім падарункі, аказалі дапамогу ў вырашэнні існуючых праблем.
Так, член Савета Рэспублікі Нацыянальнага сходу Рэспублікі Беларусь, начальнік Галоўнага ўпраўлення па ахове здароўя Віцебскага абласнога выканаўчага камітэта Юрый Lзяркач і дырэктар ААТ «БелВітуніфарм» Сяргей Бальшакоў падчас акцыі «Нашы дзеці» наведалі выхаванцаў сацыяльна-педагагічнага цэнтра Дубровенскага раёна.
Тут пражываюць дзесяць дзяцей і шасцёра наведваюць групы дзённага знаходжання. Навагоднім падарункам для кожнага з іх стаў заплечнік з цукеркамі ў выглядзе сімвала года. Госці падарылі СПЦ ноўтбук і мультымедыйную ўстаноўку, якія дапамогуць педагогам цэнтра удасканальваць метады і формы работы з выхаванцамі і іх бацькамі.
Павіншаваць хлопчыкаў і дзяўчынак прыйшлі прадстаўнікі мясцовай улады - Анатоль Лукашоў, старшыня Дубровенскага райвыканкама і Святлана Рыжанская, намеснік старшыні. Выхаванцы цэнтра прымалі віншаванні ад прадстаўнікоў грамадскіх арганізацый, камісіі па справах непаўналетніх, прадпрыемстваў, банкаў, дзяржустаноў, раённага суда, індывідуальных прадпрымальнікаў Дубровенскага раёна.
Дзеці ў сваю чаргу павіншавалі гасцей з Новым годам, уручыўшы ім сувеніры, зробленыя сваімі рукамі. Танцы, гульні, вершы, карагоды, казачнае навагодні паказ - дзеці і дарослыя адправіліся ў падарожжа, дзе сустрэліся з казачнымі персанажамі і іх нялёгкімі заданнямі.
Па завяршэнні свята Юрый Дзяркач адзначыў, што дабрачынная акцыя дае дзецям магчымасць адчуць клопат і паверыць у цуды.
— Акцыя «Нашы дзеці» асабліва падкрэслівае значнасць кожнага дзіцяці, дазваляе яшчэ раз звярнуць увагу на хлопчыкаў і дзяўчынак, якія трапілі ў няпростую жыццёвую сітуацыю. Сёння ёсць усе магчымасці для таго, каб дзеці змаглі атрымаць адукацыю не толькі ў сярэдняй школе, але і працягнуць навучанне ў сярэдніх спецыяльных і вышэйшых установах адукацыі. Яны павінны ведаць, што дзяржава заўсёды пра іх клапоціцца. Дзеці маюць рэальныя магчымасці стаць тымі, кім яны мараць быць, - і гэта вельмі важна. Безумоўна, вельмі добра, калі ёсць сям'я. І дзяржава павінна рабіць усё магчымае, каб дзеці не былі самотныя.
Юлія СТАРАВОЙТАВА.
