У Дубровенскім раённым цэнтры дзяцей і моладзі прайшлі дабрачынныя навагоднія святы ў рамках акцыі «Нашы дзеці»
25 снежня ў раённым цэнтры дзяцей і моладзі прайшлі дабрачынныя навагоднія святы для дзяцей, якія выхоўваюцца ў апякунскіх і прыёмных сем'ях, для дзяцей з асаблівасцямі развіцця, а таксама прызнаных маючымі патрэбу ў дзяржаўнай абароне.
—Праводзіць навагоднія ёлкі стала добрай традыцыяй нашага цэнтра дзяцей і моладзі, - распавяла метадыст ЦДіМ Алена Віткоўская. - Сёлета калектыў Цэнтра падрыхтаваў праграму «Навагодняя тусоўка, або Давай пажэнімся». Нам хацелася адысці ад звыклага сцэнара, паспрабаваць зрабіць казку на сучасны лад — патлумачыла яна
Хлопцы разам з бацькамі і гасцямі свята акунуліся ў навагоднюю атмасферу разам са Снягуркай, злой ведзьмай, старым Хоттабычам і іншымі казачнымі персанажамі. Вясёлыя песні, танцы і гульні прыйшліся па душы ўсім прысутным. Выручыўшы з бяды Дзеда Мароза, хлопцы зладзілі ўласнае прадстаўленне з навагоднімі вершамі і песнямі. Кожнага з іх добры чараўнік узнагародзіў падарункам і цёплымі пажаданнямі на будучы год.
З надыходзячым Новым годам гасцей свята павіншавала і начальнік аддзела па адукацыі Дубровенскага райвыканкама Ірына Кантроўская. Яна пажадала як дзецям, так і дарослым выканання самых запаветных жаданняў, а таксама здароўя, добрага настрою
—Вельмі важна, каб і дарослыя, і дзеці заўсёды памяталі, што вы ёсць адзін у аднаго — а гэта самае галоўнае, - дадала Ірына Сяргееўна.
У рамках рэспубліканскага праекта «Нашы дзеці» калектыў Цэнтра дзяцей і моладзі прыме ўдзел у навагоднім свяце для ясляў-сада аг.Асінторф. Акрамя дабрачынных ранішнікаў яны праводзяць святы для ўдзельнікаў аб'яднанняў па інтарэсах, дзяцей працуючых у цэнтры супрацоўнікаў, а таксама шэраг мерапрыемстваў у арганізацыях Дубровенскага раёна.
