У Беларусі ад грыпу прышчэплена ўжо 38 працэнтаў насельніцтва

У Беларусі прадаўжаецца кампанія па вакцынацыі насельніцтва ад грыпу, ужо прышчэплена прыкладна 38 працэнтаў. Аб гэтым паведаміла ў прэс-цэнтры БЕЛТА загадчыца аддзялення імунапрафілактыкі аддзела эпідэміялогіі Рэспубліканскага цэнтра гігіены, эпідэміялогіі і грамадскага здароўя Вераніка Высоцкая.

"Да канца лістапада, як мы разлічваем, завершыцца актыўная фаза. Стаіць задача зрабіць прафілактычныя прышчэпкі супраць грыпу як мінімум 40 працэнтам насельніцтва. Вакцынацыя ў гэтым годзе ідзе вельмі актыўна. На ўчарашні дзень прышчэплена крыху больш за 38 працэнтаў насельніцтва, або больш за 3,5 млн чалавек", - расказала Вераніка Высоцкая. Яна дадала, што вакцына ва ўсіх адпаведных установах ёсць у дастатковай колькасці. Спецыяліст растлумачыла і прычыны больш позняй пастаўкі некаторых вакцын у бягучым годзе. "У гэтым сезоне СААЗ на месяц пазней аб'явіла рэкамендаваны штамавы састаў вакцын. А для вытворчасці трэба мінімум 6 месяцаў. Таму пастаўка адбываецца крыху пазней. Але, зыходзячы з эпідэміялагічнай сітуацыі, мы можам праводзіць прышчэпкі і ў пачатку снежня", - сказала яна.

З 2012 года вакцынацыя супраць грыпу ўключана ў Нацыянальны каляндар прафілактычных прышчэпак Беларусі і праводзіцца на бясплатнай аснове некаторым групам насельніцтва. Сярод іх дзеці ва ўзросце ад 6 месяцаў да 3 гадоў, дзеці ад 3 гадоў і дарослыя з хранічнымі захворваннямі, асобы з імунасупрэсіяй, старэйшыя за 65 гадоў, цяжарныя, медыцынскія і фармацэўтычныя работнікі, дзеці і дарослыя, якія знаходзяцца ва ўстановах з кругласутачным рэжымам знаходжання, работнікі дзяржорганаў, якія забяспечваюць бяспеку дзяржавы і жыццядзейнасць насельніцтва. За кошт сродкаў мясцовых бюджэтаў бясплатна вакцынуюцца школьнікі, іншыя дзеці, якія наведваюць арганізаваныя калектывы, студэнты.

Групы рызыкі бясплатна прышчэпліваюць вакцынай "Грыпол плюс" (Расія). Прадпрыемствы могуць самі выбраць, якую вакцыну яны будуць закупляць для вакцынацыі сваіх супрацоўнікаў. Акрамя названай, зарэгістраваны "Ваксігрып" (Францыя), "Інфлювак" (Нідэрланды), а таксама чатырохвалентная вакцына "Ваксігрып Тэтра" (Францыя), якая ўжо з'явілася ў асобных медыцынскіх цэнтрах. Дарэчы, Міністэрствам аховы здароўя прапрацоўваецца пытанне аб тым, каб закупляць гэту вакцыну за кошт бюджэту, але ці адбудзецца гэта ўжо да наступнага эпідэмічнага сезона, залежыць ад шматлікіх фактараў, растлумачыла Вераніка Высоцкая.

Імунітэт пасля прышчэпкі з'яўляецца на працягу 10 дзён, часам хутчэй, і захоўвае сваё дзеянне ад 6 месяцаў да года. Таму прышчэпкі супраць грыпу трэба рабіць штогод. Тым больш што састаў вакцын кожны раз змяняецца ў залежнасці ад прагназуемых актыўных штамаў віруса.

Медыкі адзначаюць, што прафілактыка на ўзроўні 40 працэнтаў прышчэпленых ад грыпу - гэта неабходны мінімум. Для фарміравання калектыўнага імунітэту, які не дасць распаўсюдзіцца захворванню, трэба, каб са 100 чалавек 80 былі прышчэплены, сказаў прафесар кафедры інфекцыйных хвароб Беларускага дзяржаўнага медыцынскага ўніверсітэта Сяргей Жаваронак.

"Захваральнасць на грып сярод прышчэпленых у мінулым сезоне была амаль у 13 разоў ніжэйшая, чым сярод непрышчэпленых, 98 працэнтаў людзей з лабараторна пацверджаным грыпам у мінулым годзе не былі прышчэплены, - прывяла статыстыку Вераніка Высоцкая. - У цэлым паказчык мінулага года быў 16,8 на 100 тыс. насельніцтва. Гэта вельмі мала".

Усе навіны