Каля Br1,8 млрд плануецца дадаткова накіраваць у 2020 годзе на зарплаты бюджэтнікам

Каля Br1,8 млрд плануецца дадаткова накіраваць у 2020 годзе на зарплаты ў бюджэтным сектары. Аб гэтым гаворыцца ў артыкуле "Асноўныя падыходы да фарміравання праекта бюджэту на 2020 год" начальніка галоўнага ўпраўлення бюджэтнай палітыкі Мінфіна Алены Печань, размешчаным у часопісе "Финансы. Учет. Аудит", паведамляе БЕЛТА.

Аб'ём сродкаў у суме каля Br15 млрд па базавым сцэнарыі развіцця эканомікі дасць магчымасць забяспечыць суадносіны зарплаты бюджэтнікаў і зарплаты па эканоміцы ў цэлым на ўзроўні 80 працэнтаў, выканаць узгодненыя ўрадам графікі павышэння заработнай платы педагагічных і медыцынскіх работнікаў.

Усяго ў структуры кансалідаванага бюджэту расходы на аплату працы складуць больш за трэць ад агульнага аб'ёму (з улікам адлічэнняў на сацыяльнае страхаванне).

Акрамя таго, дадатковыя сродкі спатрэбяцца для падтрымкі пенсійных выплат не ніжэй за 40 працэнтаў ад сярэдняй заработнай платы. Грошы плануецца цалкам прадугледзець у расходнай частцы бюджэту.

У цэлым у 2020 годзе ў ФСАН у выглядзе субвенцый плануецца накіраваць каля Br2 млрд.

У праекце бюджэту прадугледжаны таксама сродкі на прадаўжэнне фінансавання "сямейнага капіталу" на сярэднетэрміновы перыяд (каля Br350 млн), на аказанне аднаразовай матэрыяльнай дапамогі ветэранам Вялікай Айчыннай вайны і іншым катэгорыям грамадзян, якія пацярпелі ад наступстваў вайны, у сувязі са святкаваннем 75-годдзя Перамогі (Br18 млн, падтрымку атрымаюць амаль 22 тыс. чалавек).

"Расходы на сацыяльную сферу павялічацца не менш як на 11 працэнтаў", - адзначыла Алена Печань.

Прадугледжаны і пэўныя навацыі ў жыллёвым будаўніцтве. У прыватнасці, у рэспубліканскім бюджэце будзе істотна (у 3,5 раза) павялічаны аб'ём мэтавых субвенцый на будаўніцтва аб'ектаў інжынерна-транспартнай інфраструктуры ў жылой забудове. Будаўніцтва энергетычнай інфраструктуры будзе ажыццяўляцца на прынцыпах раўнадолевага ўдзелу (50 працэнтаў - рэспубліканскі бюджэт, 50 працэнтаў - уласныя сродкі арганізацый Мінэнерга). Практычна ўдвая (да Br222 млн) павялічацца выплаты адрасных субсідый грамадзянам па крэдытах, выдадзеных па ўказе нумар 240.

Што датычыцца міжбюджэтных адносін, то бюджэтная палітыка арыентавана на стварэнне ў рэгіёнах роўных умоў для жыцця. Абласцям будзе аказана істотная падтрымка: амаль на трэць (да Br5,3 млрд) узрасце памер сродкаў, якія перадаюцца ў мясцовыя бюджэты з рэспубліканскага.

Капітальныя расходы будуць абмежаваны. Фінансаванне дзяржаўнай інвестыцыйнай праграмы за кошт бюджэту прадугледжваецца захаваць у аб'ёмах бягучага года. Прапануецца больш актыўна задзейнічаць знешнія дзяржаўныя пазыкі.

Усе навіны